Sestaok aldi baterako aparkaleku bat sortu nahi du Rebonzan
Abenduaren 2 astearterako bilera bat dago aurreikusita Aldundiaren eta Udalaren artean
Sestaoko alkateak, Gorka Álvarez, Rebonzako antzinako eskolaren orubean aparkaleku bat sortzea proposatu du, Bizkaiko Foru Aldundiak gizarte-izaeradun ekipamendu bat eraikitzeko proiektuan aurrerapausorik eman arte.
Álvarezen iritziz, inbertsio txiki batekin behin-behineko gune bat presta daiteke, ia ehun ibilgailu sartzeko gaitasuna izango lukeena eta auzoan dauden aparkaleku-arazoak arinduko lituzkeena.
Abenduaren 2 astearterako bilera bat dago aurreikusita Aldundiaren eta Udalaren artean, eta hori izango da alkateak mahai gainean jarriko duen proposamena, Foru Aldundiko Gizarte Ekintzako Sailak atzo iragarri ondoren Bizkaiko Gizarte Zerbitzuen Maparen berrikuspena amaitu arte Rebonzako egoitza berriko proiektua “stand-by” uztea erabaki duela.
Horren harira, Gorka Álvarezek adierazi du Sestaoko Udalak ez duela Rebonzako garapen urbanistikoari uko egingo: “Zorroztasunez jokatuko dugu Aldundiarekin, eta haiekin elkarrekin lanean jarraituko dugu proiektu hau edo antzeko ezaugarriak izango dituen beste bat auzoan gauzatu dadin.”
Alkatearen ustez, une honetan “agian ez da beharrezkoa 120 plazako egoitza bat Ezkerraldean”, eta, horren ordez, “proiektu misto bat izan beharko luke, gizarte-izaeradun hainbat baliabide gune berean uztartuko dituena, Abadiñon gertatu den bezala.”
Ildo horretan, gaineratu du “lasaitzen gaituela Bizkaiko Foru Aldundiko Gobernu Kontseiluak 2023ko abenduaren 28an hartutako erabakiak; orubea erosi zutenean esan baitzuten haren erabilera beti izango dela mendekotasun-egoeran dauden pertsonentzako gizarte-zerbitzuetara bideratua”.