Abadiñoko Udalak 14 milioi euroko aurrekontua onartu du 2026rako
EH Bilduk, AIBk eta PSE-EE-k alde bozkatu zuten, eta EAJk, aldiz, kontra
Abadiñoko Udalak 14.183.475,96 euroko aurrekontua izango du 2026an; hau da, aurtengoa baino % 7,15 handiagoa. Horrela erabaki zuten atzo, azaroaren 25ean, ospatutako osoko bilkuran, EH Bildu, AIB eta PSE-EEren aldeko botoekin eta EAJ-ren kontrako botoarekin. Aurrekontuez gainera, aho batez onartu zen 2026-2028 dirulaguntzen plangintza estrategikoa.
Zerga zuzenek, zeharkakoek, tasek eta bestelako sarrerek aurrekontu osoaren % 47a osatzen dute —% 30 zergak eta % 17 tasak—. Horiez gainera, Bizkaiko Foru Aldundiak Udalkutxa bitartez egindako ekarpena aurrekontu osoaren % 52 da.
Kopuru horretatik, 755.000 euro bideratuko dira inbertsioetara, eta, horri, 2026. urtean zehar diru-kutxako soberakinen bidez aurrera eramango diren inbertsioak gehitu behar zaizkio, Legegintzaldi Agendan zehaztutakoak, hain zuzen ere. Lehentasunezko proiektuen artean daude Atxarteko sarrerako bidea berreskuratzea, Irazolako auzotarrei udal ur hornidura sarea bermatzea, Urkiolako ur kaptazioak publifikatzea eta kirol guneak egokitzea.
Horrez gain, 700.000 euro inguru bideratuko dira dirulaguntzetara datorren urtean. “Herriko eragileak Abadiñon herrigintza bizi bat bermatzeko ezinbesteko tresna dira. Gaur egun, 58 herri eragile inguru daude, eta horiek indartzean jarri nahi izan dugu arreta”, adierazi du udal gobernu taldeak. Aurrekontu hauen bidez, datozen hiru urteetarako dirulaguntzen plagintza estrategikoa bermatzen da, urtean, 700.000 euro baino gehiago bideratuz herrigintzara. Dirulaguntzen 2026-2028 plangintza estrategikoa talde politiko guztien babesarekin onartu zen atzoko Osoko Bilkuran.
“Azken urteetako adostasunik handiena izan dute 2026ko aurrekontuek, eta, horrek, aukera emango digu Abadiñoren etorkizuna era eraginkorragoan eraikitzeko. Aurrekontuak herriaren eta herritarren garapena ziurtatzeko eta euren beharrizanei erantzuteko tresna garrantzitsua dira, eta zerbitzuak eta ongizatea hobetzeko gakoak ere ematen ditu”, adierazi du udal gobernu taldeak. Era berean, gaineratu dute Abadiñoko Udala ez dagoela inongo zorpetze prozesuetan sartuta, eta, ondorioz, duen osasun finantzieroa ona da.