Bi udalerrien arteko oinezko eta bizikletazko lotura den Bolu bidea hobetzea eta egokitzea izango da Mungiako eta Gamiz-Fikako udalen hurrengo erronka. Horretarako, Gamiz-Fikako Udalak 14.800 euroko inbertsioa egingo du, eta Mungiak, aldiz, 5.200 eurokoa. Proiektuak bidea garbitu, profilatu eta zolatzeko lanak aurreikusten ditu, baita hondakinen kudeaketa eta irisgarritasuna hobetzea ere. Guztira, 1.720 metro linealen gainean jardungo da.
Ekimen hau mugikortasun iraunkorrago, seguruago eta ingurumenarekiko begirunetsuago baterantz aurrera egiteko konpromiso partekatuari erantzuten dio. Hala, bi udalek beren udalerrietako bide-azpiegiturak kudeatzeko eta kontserbatzeko borondatea dutela adierazten dute.
Hitzarmen horri esker, Olagortaren (Gamiz-Fika) eta Bolu baserriaren (Mungia) arteko joan-etorriak erraztuko dira oinez eta bizikletaz, Iturribaltzagatik doan bidegorriarekin bat eginez. "Konexio horrek inguruko mugikortasun aktiboa indartzeaz gain, ohitura osasungarriak sustatzen ditu eta emisio kutsatzaileak murrizten laguntzen du", azaldu du Alaitz Erkoreka Baraiazarra Mungiako alkateak. "Horrelako kasuetan, ezinbestekoa da bi udalerrien artean koordinatuta eta eraginkortasunez lan egitea. Udalen arteko lankidetzaren adibide bat da, herritarren bizi-kalitatea hobetzea helburu duena, azpiegitura irisgarriak, seguruak eta iraunkorrak sustatuz ", gaineratu du.
Ana Rubio Andrés Gamiz-Fikako alkateak azpimarratu duenez, ekimen hau hainbat urtetako lanaren emaitza da, eta udal honek mugikortasun iraunkorrago, seguruago eta emisioen murrizketari laguntzen dion konpromiso argi batetik sortu da. "Gure herritarrentzat, beharrezkoa eta erronka garrantzitsua da Gamiz-Fika eta Mungia arteko oinezkoentzako eta bizikletentzako konexio baterantz aurrera egitea, hori baita eskualdeburua eta funtsezko zerbitzu asko eskaintzen dizkiguna. Egunero autorik gabe, oinez edo bizikletaz, Olagorta (Gamiz-Fika) eta Bolu baserria (Mungia) artean ibili ahal izatea, Iturbaltza zeharkatzen duen bidegorriarekin lotuz, funtsezko pasabidea da gure udalerriarentzat".
Gaur egun, erabaki da jarduketak aldi berean egingo direla, arduradun tekniko bakar batek gainbegiratuta, eta horrek baliabide publikoak optimizatzea ahalbidetuko du. Hala, bi udaletako ordezkariek osatutako jarraipen-batzordeak proiektua behar bezala gauzatzen dela zainduko du, eta hartutako konpromisoak garaiz eta behar bezala betetzen direla bermatuko du.
