15.000 euro genero berdintasuna eta indarkeria matxistaren prebentzioa sustatzeko
Deialdia 2025eko urriaren 31ra bitarte egongo da zabalik
Durangoko Udalak 15.000 euroko aurrekontua bideratuko du emakumeen eta gizonen berdintasunarekin eta indarkeria matxista prebenito eta ezabatzearekin lotutako jarduerak finantzatzeko laguntzen deialdi berrirako.
Laguntza horiek 2025-2027 Dirulaguntzen Plan Estrategikoaren barruan daude, eta Durangoko udalerrian eremu horietan lan egiten duten irabazi asmorik gabeko erakunde eta elkarteek garatutako proiektuak babestea eta sustatzea dute helburu.
"Laguntza deialdi honekin, urrats garrantzitsua ematen dugu berdintasuna sustatzen eta indarkeria matxistaren aurkako borrokan lan egiten duten erakundeei laguntzeko. Durangoko Udalak horrelako ekimen bat abiarazi duen lehen aldia da, durangarrengan benetako eragina duten proiektuak sustatzea helburu duena. Helburua berdintasunezko gizarte baterantz aurrera egiten jarraitzea da, non pertsona guztiak, generoa edozein dela ere, indarkeriarik eta diskriminaziorik gabe bizi ahal izango diren ", nabarmendu du Jesica Ruiz Durangoko Udaleko Berdintasun zinegotziak.
Guztira 15.000 euro bideratuko dira laguntza hauetara, eta kalitate programak aurkezten dituzten elkarteen artean banatuko dira, genero berdintasuna eta indarkeria matxista desagerraraztea sustatzen dutenei arreta berezia eskainiz. Diru-laguntza hauek Eusko Jaurlaritzaren Elkarteen Erregistroan izena emanda dauden eta Durangoko udalerrian jarduerak burutzen dituzten edo bertako biztanleei zuzendutako erakundeek eskuratu ahal izango dituzte.
Eska daitekeen diru-laguntzaren gehienezko zenbatekoa aurkeztutako aurrekontuaren % 75 izango da, eta gehienez 5.000 euro. Laguntza hauek bateragarriak dira helburu bererako beste erakunde publiko edo pribatu batzuek emandako diru-laguntzekin, betiere gainfinantzaketarik ez badago.
Deialdia 2025eko urriaren 31ra bitarte egongo da zabalik, eta eskaerak Durangoko Udalaren egoitza elektronikoaren bidez aurkeztu behar dira.
Deialdiari eta eskaera prozesuari buruzko informazio gehiago nahi izanez gero, interesa duten erakundeek Durangoko Udalaren webgunean kontsultatu ditzakete oinarriak, edo Durangoko Udaleko Berdintasun Arloarekin harremanetan jar daitezke Andragunean (Lariz Dorrea 2), andragunea@durango.eus helbidean edo 94 465 70 92 telefonora deituz.