Landako II-ko fitness aretoa abuztuko lehen hamabostaldian itxiko da
Guztira 105 makina berrituko dira eta 300 entrenamendu osagarri baino gehiago gehituko dira
Durangoko Udalak ezagutzera eman du Landako II-ko fitness aretoa itxita egongo dela abuztuko lehen hamabostaldian, epe horretan hasiko baitira espazioa behar tekniko berrietara egokitzeko lanak. Obra horiek espazioa modernizatzeko eta zerbitzu funtzionalagoa eta kalitate handiagokoa eskaintzeko helburuarekin egingo dira.
Jarduketa hauek Durango Kirolakek bultzatutako berritze integraleko planaren baitan kokatzen dira, eta plan honek egungo ekipamendu osoaren ordezkapena aurreikusten du, 1.221.000 eurotik gorako inbertsioarekin. Helburua udal baliabideak optimizatzea eta eraginkorragoa eta jasangarriagoa izango den eredurantz aurrera egitea da.
Guztira 105 makina berrituko dira, besteak beste, kardio ekipamendua (zintak, bizikletak, eliptikoak, arraun makinak, eskailerak) eta indar entrenamendurako ekipamendua. Horrez gain, 300 entrenamendu osagarri baino gehiago gehituko dira, hala nola, pisu libreak (mankuernak, diskoak, barrak), kettlebell-ak, esterillak eta bestelako osagarri funtzionalak.
Lurrean ere berritze lanak egingo dira gomazko zorua eta belar artifiziala instalatuz, espazioaren segurtasuna eta malgutasuna hobetzeko. Ekipamendu berriaren instalazio osoa 2026ko hasieran amaitzea aurreikusten da eta abuztuko lanek eraldaketa prozesu honen hasiera markatuko dute.
Abuztuko izen-emateetan aldaketak
Itxiera aldi baterako dela eta, eta salbuespenezko moduan aurten, fitness zerbitzuaren abuztuko izen-emateetarako baldintza bereziak ezarri dira:
Ordainketa helbideratuta duten pertsonentzat:
- Abuztuaren 18tik aurrera (lanen ondoren aretoa berriz irekiko denean) fitness aretoa erabili nahi bada, berariaz sortutako kuota berezi batean izena eman beharko da.
- Uztailean izena emanda egon eta abuztuan joan nahi ez bada, ez da hileko kobrantzarik egingo.
- Irailean izen-ematea automatikoki berrituko da, abuztuaren 25a baino lehen baja eskatzen ez bada.
Ordainketa helbideratu gabe duten pertsonentzat:
- Ez da izen-emate automatikorik egingo. Abuztuaren 18tik aurrera zerbitzua erabili nahi dutenek izen-emate puntual berezia egin beharko dute.
Halaber, abuztuko azken bi astetarako tarifa bakarra ezarri da, baita jarduera anitzeko tarifa bat ere, Tabirako igerilekuetara sartzea eta fitness gela erabiltzea barne hartzen dituena.
Durango Kirolakek trantsizio fase honetan erabiltzaile guztien ulermen eta lankidetza eskertzen du, eta herritar guztien zerbitzura dauden kirol instalazioak etengabe hobetzeko konpromisoa berretsi du.