Elorrioko herritarrek hitza hartu dute Daigun 2025-2050 proiektuan

Asteazkenean, ekainaren 25ean, ospatutako Daigun Elorrio 2025-2050 egitasmoaren baitan antolatu duten batzar irekian parte hartu dute Elorrioko bberroteita hamar lagun inguruk. Ekimen hau Elorrioko Udalak eta Argiñola energia berriztagarrien komunitateak antolatzen dute. Arriola Antzokian izan zen, egitasmoan laguntzen ari den Siadeco enpresaren parte-hartzearekin.

Elorrion energia-trantsizioa lortzeko 2025-2050 plana diseinatzeko deliberazio-prozesuan kokatzen da batzarra. Bertan, orain arte egindako bidean landu den diagnostikoaren gako nagusien berri eman dute arduradunek, eta haren inguruko zalantzak argitzeko eta hari ekarpenak egiteko aukera izan dute herritarrek.

Elorrionen energia-kontsumoari, berriztagarrien egungo sorkuntza-mailari eta Elorrioren sorkuntza-aukera edo potentzialari buruzko datuak azaldu dituzte. Horrez gain, aurtengo udaberrian Elorrioko 400 herritarrek osatutako lagin bati egindako inkestaren zenbait emaitza ere eman dituzte. Diagnostikoan finkatu diren bi erronka nagusiak ere azaldu dituzte: Elorrion energia-kontsumoa murriztea eta energia ahalik eta modu jasangarrienean sortzeko proiektuak garatzea.

Diagnostikoa osatzeko bestelako partaidetza-bideak

Azpimarratu beharra dago herriko gizarte-eragileen eta eragile sozioekonomikoen ikuspuntuak biltzen ere ari direla, diagnostikoa, eta ondoren landuko den plana, ahalik eta partekatuenak izateko helburuarekin. Bestalde, zalantzak edo diagnostikoari ekarpenak modu telematikoan planteatu nahi dituzten herritarrentzat, bereziki diseinatutako kanal bat zabaldu dute.