BBKren Artearen Ibilbideak erakusketa Abanto Zierbenara heldu da
38 artisten obren erreprodukzioak jasotzen ditu
Las Carreras auzoko Trinidad plaza izango da BBKren Artearen Ibilbideak erakusketaren hurrengo geralekua. Erakusketa ibiltari honek ibilbide heterogeneoa eta plurala eskaintzen du mendebaldeko artean barrena, historian zehar izaera eta jatorri desberdineko iturri literarioetan inspiratu diren egileekin.
Seigarren edizio honetan, Historiak lelopean, hainbat artista, garai eta teknikaren 38 lanen aukeraketa bideratu du (pintura, collagea, akuarela, eskultura, kartela, argazkia eta bideoa), eta Jose Luis Merino Gorospe Arte Eder Museoko Antzinako Artearen kontserbatzaileak komisariatu du.
Erakusketak Orazio Gentileschi, Anselmo Guinea, Isabel Baquedano, Jesús Mari Lazkano, Idoia Monton, Andrés Nagel edo Ana Laura Aláezen lanak biltzen ditu, margolanak, kartelak, eskultura, bideoa edo argazkia jorratuz.
2020tik aurrera, BBK Artearen Ibilbideak museoaren hedapen- eta hezkuntza-jarduera bere egoitzatik haratago darama, arte-kultura sustatzeko eta espazio publikoetan duen ondarearen aberastasuna ezagutarazteko helburuarekin. Horretarako, edizio bakoitzean gailu mugikor berri bat eratzen da, bildumako lanak fideltasun handiz erreproduzitzen dituzten panelez osatua. Irudiekin batera, obra bakoitzari buruzko informazioa, euskeraz, gaztelaniaz eta ingelesez, jaso daiteke, QR kode baten bitartez deskargatu daitekeena. Gainera, ekimen honek Hezkuntza eta Kultura Ekintza Saileko María Victoria Antoñanzasek eta César Ochoak egindako bitartekotza-programa bat eskaintzen du, ikastetxeetarako eta kultura-elkarteetarako bisita komentatuak eskaintzen dituena, eta erakusketa ikustera hurbiltzen diren pertsonen kontsultei arreta ematen diena.