The Brass Funkeys taldea izan da Haizetara, Amorebieta-Etxanoko Kaleko Fanfarreen, Banden eta Musikaren Nazioarteko Lehiaketaren hemezortzigarren edizioaren irabazlea. Guztira zortzi taldek hartu dute parte, baina Erresuma Batuko banda izan da garailea. Lehiaketa benetan arrakastatsua izan da, bisitari ugari erakarriz eta udalerri osoan jai giro alaia sortuz.
Banda onenaren saria
Ainara Ortega, presidenteak, Jou Gonzalez, musikari zornotzarrak eta Afrika Bibang abeslariak osatutako epaimahaiak XVII. edizioko irabazlea The Brass Funkeys banda izatea erabaki du. 15.000 euroko saria lortu dute.
Publikoaren saria
Iruñeko Goxo Txaranga taldeak publikoaren saria irabazi du, izenak berak dioen bezala, herri-bozketa bidez erabakita. 498 lagunek eman dute botoa Haizetara webgunearen bidez, irabazlea aukeratzeko. Taldeak 4.000 euroko saria jaso du.
Instrumentista onenaren saria
Epaimahaia arduratu da Haizetara jaialdiaren edizio honetako instrumentalistarik onena aukeratzeaz. 1.000 euro jaso du Suck da Head taldeko tronboiak, Quentin Longepe.
'Aupa gazteak – Bertsio onena' saria
Aurten, halaber, laugarren sari gehigarri bat egon da, SDAren 100. urteurrenaren harira. Hala, “Aupa gazteak – Bertsio onena” izenburupean, Undertow Brass Band taldea izan da sari honen garaile. Honek ere, 1000 euroko saria eskuratu du.
Amorebieta-Etxanoko Udala, ekitaldiaren antolatzailea, pozik agertu da Haizetara ekimenaren edizio honen garapenarekin eta harrerarekin. Lehiaketa honek kaleko musikaren esparruan nazioarteko erreferente gisa duen posizioa sendotu du, artistei beren talentua erakusteko aukera emanez eta komunitateari kalitate handiko musika-ikuskizunez gozatzeko aukera emanez.
Udalak eskerrak eman dizkie parte hartzaile, kolaboratzaile eta bertaratutako guztiei Haizetara 2025 jaialdiaren arrakasta ahalbidetzeagatik. Udalak kultura eta musikarekin duen konpromisoa berretsi egin da beste behin, eta gogotsu espero da ekitaldi garrantzitsu honen hurrengo edizioa.
