Síguenos en redes sociales:

Zabalik Ermuko Betiondoko igerilekua eta Ongaraiko ur-jolasak

Igerilekua goizeko 10:30ean zabalduko da egunero, eta ekainean eta uztailean 20:30 arte egongo da irekita

Deia.eus

Bilbao | 14·06·25 | 21:44 | Actualizado a las 19:27

Zabalik Ermuko Betiondoko igerilekua eta Ongaraiko ur-jolasakE. U.

Larunbat honetatik aurrera, ermuarrek Betiondoko kanpoko igerilekuaz eta Ongaraiko ur-jolasez gozatu ahal izango dute. Udako egun beroen atarian, herrian bertan freskatu eta ondo pasatu ahal izateko aukera emango du Udalak.

Igerilekua goizeko 10:30ean zabalduko da egunero, eta ekainean eta uztailean 20:30 arte egongo da irekita. Abuztuan eta irailean, aldiz, irekiera ordua mantenduko da baina 20:00etan itxiko da, orduerdi lehenago. Irailaren 14a arte gozatu ahal izango dugu igerilekuaz.

Betiondoko instalazioen bigarren urte honetarako, zenbait hobekuntza egin dira azpiegituran erabiltzaileen esperientzia hobetze aldera. Neguan zuhaitzak landatu dira berdegunean, eta hiru sarbide-tornuak QR kode-irakurgailuekin eta irakurle azkarrekin hornitu dira, sarrera-irteerak erraztu eta arinagoak izateko.

Eremuaren guztizko edukiera, urgunea eta berdegunea batuta, 1.121 pertsonakoa da. Berdeguneak hamar bat eguzkitako balinesa ditu, eguzkiaren izpietatik babesteko. Igerilekuak eraikin txiki bat du, komunak (horietako bat egokitua), bi aldagela, botikin bat eta edariak eta jakiak saltzeko makinak dituena. Dutxak erabiltzeko, Betiondo kiroldegiaren ondoko eraikineko aldageletara sartu behar da.

Atletismo-pistaren eta igerilekuaren arteko espazioa aisialdirako espazio ludiko gisa eratu da, eta, segurtasunagatik, ibilgailuentzat itxita geratu da. Hainbat joko margotu dira, eta joko-, tenis-, mahaiak, bankuak eta paper ontziak jarri dira.

Ongaraiko ur-jolasak ere prest

Ongaraiko uretako jolasen gunea ere gaur, larunbata, ireki da beste urte batez, udako egunik beroenetan herrian bertan freskatu eta dibertitzeko. Parkea egunero 10:00etatik 20:00etara egongo da zabalik irailaren erdialdera arte.

Urarekin jolasteko hainbat elementu daude Ongarain: kanoiak, zurrusta bertikalak, zurrusta bideragarriak, ur lainoztatuzko uztai bat eta ura pilatzen duen kubo birakari bat, oszilazioarekin bi alditan isurtzen duena. Berdegune bat eta solarium mailakatu bat, komun kimiko bat eta edateko ur-iturri bat ere badaude.