Galdakaoko magaletik, euskera erdire

Dena prest Galdakaon 2025eko Ibilaldia ospatzeko Jose Mari Martinez Bubu

47. edizio honetan Ibilaldia indartsu entzungo da Galdakaon, komunitate oso baten eta, batez ere, Eguzkibegi Ikastolaren lan nekaezin eta boluntarioari esker. Lan handiko urtea izan da. Emaitza datorren igandean, hilak 25, izango da, baina egun bat lehenago, larunbatean, nobedade gisa, Kurtzeko plazako gunea arratsaldeko bost eta erdiak eta gaueko hamarrak bitartean irekiko da. Bertan, Athletic-eko Genunine taldeko jokalariak emango diote hasiera futbol txapelketa batekin. Txapelketa honetan nahi duen guztiak parte hartu dezake. Tartean, umeentzako tailerrak, DJak eta BENGO taldea izango dira.

Hori izango da Bizkaiko ikastolen urteroko jaiaren berrikuntzetako bat, "herriko giroa berotzeko" balioko duena, Oihana Aranak eta Itxaso Etxebarriak, hurrenez hurren ikastetxe horretako lehendakariak eta zuzendariak, ekitaldien aurkezpenean iragarri bezala. Beste sorpresetako bat igandean bertan iritsiko da, agintarien harreran. Ez dute aztarnarik eman nahi izan; "leku berezi batean" izango dela baino ez dute esan.

Badute esperientzia Eguzkibegi Ikastolan jaiak antolatzen. Izan ere, bigarren Ibilaldia izango da 2009koaren ondoren. Denbora guzti honetan ikastetxeak eboluzionatu egin du -beste hainbatek egin duten bezala- garai eta errealitate berrietara egokitzen joateko, baina nortasuna galdu gabe: euskara, kultura, sormena, auzolana... Azken urteotan, eraikinaren hainbat instalazio eguneratzeko ere aprobetxatu dute, erabilera, errutina eta funtzio berriekin.

Ahalegin ekonomiko horrek merezi izan du, eta zentrotik espero dute asteburu honetan Galdakaora hurbiltzea espero diren milaka pertsonen elkartasunari esker arindu ahal izatea. Gomendioa, beti bezala, garraio publikoa erabiltzea da: autobusa eta trena (8 minuturo egongo da); eta ibilgailu pribatuetarako Obramaten dagoen aparkalekua egokituko da.

Guztira lau kilometro pasatxo izango dira, eta nahi dutenek kilometro bat gehiago egin ahal izango dute herriko berdegune batean eta hiru gunetan, kontzertuak, jolasak eta jarduerak egiteko. Klasiko bat Ibilaldian, aurten "Magaletik herrire, euskera erdire" goiburuarekin.

Duela hilabete batzuk azaldu zuten bezala, esaldiak eta logotipoak "magal" hitza azpimarratzen dute, ikastolak eskaintzen duen familia-giroari eta zentroaren kokapenari erreferentzia egiteko, mendiaren magalean. Eta horri "herrira" gehitu behar zaio, ikastolak Galdakaoko herriarekin duen lotura islatzeko.

Hala azpimarratu zuen Josu Telleriak, Ibilaldi Elkarteko presidenteak, eta Aranak eta Etxebarriak baieztatu zuten jai hau "komunitate osoaren lanaren emaitza" dela. Antolatzaileen adierazten duten bezala “hezkuntza-komunitate osoak, ikasleek, irakasleek eta ikasle ohiek, baita gurasoek ere, antolakuntzan lagundu dute".

Programa hori, askotarikoa eta ugaria, ehuntzeko ezarri diren helburuak honako hauek dira: euskara sustatzea, parte hartzea, ekitaldiaren iraunkortasuna, inklusibotasuna eta euskal kulturaren eta nortasunaren balioak defendatzea. Hortik dator Euskal Herri osoko eta atzerriko euskaltzaleen parte hartze eta konplizitaterako deia. Besarkada bakoitzak, taupada bakoitzak, musu bakoitzak, klik bakoitzak eta euskarazko hitz bakoitzak bere etorkizuna argitzen dute.

Hiru gune

Ibilaldiaren 47. edizio honek 4 kilometro baino gehiagoko ibilbidean banatutako hiru gune izango ditu eta kontutan izan behar da Ibilaldia Larunbatean hasiko dela eta hirugarren gunea, Erdiko gunea, 17.30etatik 22.00etara zabalik egongo dela.

1.gunea Eguzkibegi ikastola - Magala

Lehenengo gunea, "Magala", Eguzkibegi ikastolan bertan egongo da. Hemen izango du jaiak bere sorburua eta zentzua: hezkuntza komunitatea, eguneroko bizipenak eta ikastolaren proiektuaren esentzia.

Eguzkibegitik azpimarratzen duteneziIkastola “ez da soilik eraikin bat gure seme-alaben hazteko eta ikasteko tokia da, eta, aldi berean, balioak, euskara eta kultura bizitzeko espazioa”. Beraz, lehenengo gune hau da Eguzkibegiko identitatearen isla, non jaiaren arima bizirik dagoen.

Hasiera ekitaldian, ikaskomunitateaz aparte, inguruko agintariak eta beste ikastoletako ordezkariak izango dira gonbidatu gisa. Ikastolan hasi eta magaletik herrira zabalduko da jaia.

Jardunaldia 11.00etan hasiko da "Erronka DBH" lehiaketarekin eta bertan Baionako Estitxu Robles Kolegioko ikasleek hartuko dute parte. Ondoren bi dantza emanaldi izango dira Taupadak eta Dantza Plaza Andra Mariren eskutik eta 13:00etan Akerbeltzen erromeria izango da. 14.30etik 19.00etara, Estitxu Robles, Mitxel Play eta Dj Bull arituko dira.

2. gunea Romualda Zuloaga plaza - Herria

Bigarren gunean, Romualda Zuloaga plazan kokatuko da, ikasleen eta familien parte handi bat bizi den auzoan. Auzo hau komunitatearen parte da: gertutasuna, konplizitatea eta elkarlana.

Auzoan jaiaren presentziak adierazten du Eguzkibegi Ikastolak bere oinarriak familien inplikazioan dituela. Hemen ere ospatuko dute, eta ospakizunaren bidez, auzoko bizilagunen parte-hartzea eta ekarpena aitortuko dute.

Gune honetan "komunitatearen ordezkari"den Motx pailazoak emango dio hasiera programari 11.00etan. 12.30ean, Taupadak taldeak hartuko du lekukoa, eta 13.30ean, eta 14.00etan, Harritik emakumeen kirol ikuskizuna eskainiko du. Arratsaldea musikaz beteta egongo eta 15.00etatik 19.00etara, Zazpizarreko erromeria, musika eskolako kalejira eta Kai Nakairen emanaldia izango dira.

3.gunea Kurtzeko plaza - Erdia

Baina Eguzkibegi Ikastolako jaia ez da mugatuko ikastolara, kaleetara ere atarako da, herriari bere parte izateko gonbita eginez. Herri gunean kokatutako gune honek “jaiaren irekitasuna adierazten du gure proiektua herriaren parte baita, eta herria, gure proiektuaren parte. Gune honek elkargune izatea du helburu, herritarrak jaiaren parte bihurtuz, eta ikastolaren indarra eta poza kaleetan biziaraziz”.

Tor magoarekin irekiko da gunea 11.00etan, eta 12.00etan haurrentzako Herri Kirolen erakustaldia izango da eta gainerakoentzat 13.00etan Sutabiz Fundazioaren eskutik. Arratsaldean, Dj Kaktusek musika jarriko du 15.00etatik aurrera eta Ollokik 16.00etan. Eguna bukatzeko Oxabi taldearen kontzertua izango da 17.30ean.

Hiru guneetan glutenik gabeko janaria eta edaria eskainiko da, eta indarkeria sexistaren adierazpen mota guztien aurkako espazio seguruak prestatuko dira. "Gure konpromisoa argia da. Ez dugu indarkeria-adierazpenik onartuko, ez fisikoki, ez psikologikoki, ez ahoz ", zioen Etxebarriak aurkezpenean.

Ekitaldiz jositako asteburua

Asteburu bizia izango da, hainbat ekitaldiz beteta: tailerrak, jolasak, musika, dantzak, bazkari herrikoia eta ikasleen emanaldiak izango dira ikusgai, eta antolatzaileek gogoratzen duten bezala”helburua ez da bakarrik ondo pasatzea, baizik eta komunitatearen kohesioa sendotzea eta gure ikastolaren nortasuna ospatzea”.

Kurtzeko Plaza, Eguzkibegi Ikastolaren gunea eta Romualda Zuloaga Plaza izango dira igandean ekitaldien gune nagusiak. Zapatua, berriz, Kurtzeko Plazan ospatuko da festa nagusia.

Zapatua, festa goizeko ordu txikietan hasiko ez bada ere, arratsalde partean bizirik lehertuko da Kurtzeko Plazan. 17.30etik aurrera, haurrek tailerretan parte hartu ahal izango dute, eta aldi berean, futbol txapelketa ere jokatuko da. Musika ere ez da faltako: Kimosoundz DJk giroa berotuko du 19.30ak arte. Orduan, Bengo igoko da oholtzara, eta 21.00etan Tri DJ saioarekin emango zaio amaiera egunari.

Domekan, berriz, eguna goizean goizetik hasiko da eta hainbat guneetan banatuko dira ekitaldiak. Eguzkibegi Ikastolan, 11.00etan DBHko ikasleen erronkarekin emango zaio hasiera jardunari, eta horren ostean, dantzak eta musikak hartuko dute lekukoa: Taupadak Dantza Eskola, Andra Mari eta Akerbeltz erromeriak giroa alaituko dute. Arratsalde partean, Mitxel Play eta DJ Bull izango dira arduradunak festa bizirik mantentzeko.

Bestetik, Romualda Zuloaga Plazan, haur zein helduentzako ikuskizunak izango dira: Motx pailasoa, Go!azen, Taupadak, Harriti taldearen kirol ikuskizuna eta Zazpizar erromeria. Musikazaleek Kai Nakairen emanaldiaz gozatu ahal izango dute 17.30ean.

Azkenik, Krutzeko Plazan berriro, domekako egitarauak ikus-entzule guztiak kontuan hartzen ditu: Mago Tor, herri kirol erakustaldiak, Taberna Ibiltaria, DJ Kaktus, Olloki, eta Oxabi taldearen kontzertua izango dira, besteak beste.

Laburbilduz, Ibilaldi honek eskaintzen duen egitaraua ezin osatuagoa da, eta asteburu osoa euskaraz bizitzeko aukera emango du. Euskara, kultura eta komunitatea batzen dituen ospakizun paregabea dugu hau.

PROGRAMAZIOA

Zapatua

Gune Krutzeko Plaza

17:30 - 19:00 Futbol txapelketa

17:30 - 19:00 Umeentzako tailerrak

17:30 – 19:30 Kimosoundz DJ

19:30 – 20:45 Bengo

21:00 – 22:00 Tri DJ Saioa

Domeka

Gune Ikastola Eguzkibegi

11:00 - 11:30 Erronka DBH

11:30 - 12:00 Taupadak Dantza Eskola