Alaitz Erkoreka Mungiako biztanleekin bilduko da 'Alkateagaz berbetan' programan

Mungiako alkate Alaitz Erkorekak parte hartuko du datorren asteartetik aurrera zuzeneko elkarrizketa eta bertako bizilagunekiko hurbiltasuna indartzeko helburu duen 'Alkateagaz berbetan' programan. Bertan, herritarrek beren kezkak zinegotziarekin partekatzeko aukera izango dute. Astean lau ordu emango ditu alkateak ekimen honetan.

"Elkarrizketarako bide iraunkor berri bat ireki dugu, Mungiako ahots guztiak entzuteko", azaldu du Alaitz Erkoreka alkateak. "Ahalik eta irisgarritasun eta malgutasun handiena bermatu nahi dugu, gure udalerria hobetuko duten politikak diseinatzerakoan iritzi bakoitza garrantzitsua baita".

'Alkateagaz berbetan' saioak asteartero izango dira, goizez (10:00etatik 12:00etara) zein arratsaldez (17:00etatik 19:00etara), baina nolabaiteko malgutasuna ahalbidetuko da topaketa horiek errazteko. Era berean, eta interesdunen beharretara egokitzeko, hitzorduak aurrez aurre egin ahal izango dira alkatetzan, telefono-deiaren edo bideo-deiaren bidez.

Horretarako, proposamenak, zalantzak eta eskerrak helarazi nahi dituzten herritarrek hitzordua eskatu beharko dute Mungiako Udaleko Herritarrentzako Arreta Zerbitzuaren (HAZ) bidez, aurrez aurre zein telefonoz, 010 telefonora deituta. Egoitza elektronikoaren bidez ere eskatu ahal izango da.

"Herritarrekin harreman zuzena izatea lehentasuna izan da beti Gobernu talde honentzat, funtsezkoa iruditzen baitzaigu udalerriko eremu bakoitzeko errealitateak eta beharrak bertatik bertara ezagutzea, eta, horrela, ongizate kolektiborako erabakirik onenak hartu ahal izatea", adierazi du Alaitz Erkoreka alkateak. "Kanal berri honek, “Alkateagaz berbetan", hurbiltasun-lotura horretan sakontzen jarraitzeko eta gure erantzuteko gaitasuna are gehiago hobetzeko aukera emango digu, mungiarren bizi-kalitatea bermatuz eta hobetuz", gaineratu du. 

Auzoetara bisitak

Bere agintaldiaren ezaugarri den hurbiltasun-dinamikari eutsiz, programa berri honetaz gain, alkate jeltzaleak udalerriko auzo eta zonaldeetara bisitak antolatzen jarraituko du, aldez aurretik auzo-elkarteekin eta pertsona interesdunekin adostutako ordutegi eta kokapenetan. Alkateak, bere aldetik, herritar guztiak animatzen ditu parte hartzera eta aukera hau aprobetxatzera gobernu-taldearekin zuzenean hitz egiteko, bai "Alkateagaz berbetan" programaren bidez, bai Mungiako Udaleko herritarrei arreta emateko bideen bidez.