Udalerria hobetzeko antolatu dituzten ekintza eraldatzaileak aurkeztu dituzte Mungiako ikasleek

Udalerria hobetzeko erronkan den-denek dituzte euren ideia. Horregatik, Mungiako Udalak herritar guztien iritziak entzun nahi ditu, baita etxeko txikienak ere. Horregatik, astearte honetan goizean, maiatzaren 6an, udaletxeko osoko bilkuren aretoak Udal Foroak ekimenaren edizio berri bat jaso du, Eskola Agenda 2030 programaren barruan antolatutakoa.

Ekimen honen bidez, Bentades, Larramendi eta IES-Mungiako ikastetxeetako ikasleek udalerriaren diagnostikoaren ondorioak partekatu dituzte udal-ordezkariekin, bai eta hobetzeko proposamenak eta etorkizunerako konpromisoak ere.

Jardunaldian zehar, aurreko ikasturtean planteatutako ekimenak ere gogoratu dira – adibidez, herrian behar diren farola moten azterketa (eta non behar diren), herritarren iritzia kontuan hartuta- eta haien egoeraren jarraipena egin da. Ekitaldian Udalak aktiboki parte hartu du, egungo proposamenen bideragarritasuna baloratu du eta 2030erako Eskola Agendarekin bat datorren kudeaketa jasangarriaren aldeko konpromisoa berretsi du.

Ildo horretan, Mungiako alkate Alaitz Erkorekak ikasleen ahalegina eta inplikazioa azpimarratu ditu: "Oso pozik nago horrelako egun berezi batean berriro elkartzeagatik, ikasturtean zehar egin duzuen lan handia islatuta ikus dezakegulako. Udalerriaren egoera aztertu duzue dedikazio handiz, eta zuen proposamenak oso lagungarriak dira Mungia iraunkorrago baterantz aurrera egiteko. Udalak izugarri baloratzen du zuen ahalegina eta ematen diguzuen informazioa, oso baliabide baliotsua baita erakundeen lanerako. Ilusio berarekin parte hartzen jarraitzera animatzen zaituztegu. Eskerrik asko eta hurrengo ikasturtera arte!".