Liburu Azoka Mungiara helduko da ostiralean
Azokak 13 stand izango ditu liburudenda, argitaletxe eta banatzaileentzat
Ostiral honetatik, martxoak 21, hilaren 30era bitartean, Liburu Azokaren egoitza izango da Mungiako Matxin plaza. Urtero bezala, Euskadiko Liburu Ganbarak, Mungiako Udalarekin elkarlanean, ezinbesteko hitzordu hau antolatu du irakurzaleentzat.
Horrela, azokak 13 stand izango ditu liburudenda, argitaletxe eta banatzaileentzat, eta askotariko izenburuak eskainiko dituzte: euskal eta haur literaturako azken nobedadeetatik hasi eta gaztelaniazko eta euskarazko saiakera, dibulgazio- eta narrazio-liburuetara iritsi arte. Gainera, liburu guztiek % 10eko deskontua izango dute.
Hitzaldiak eta erakusketak
Programazioaren barruan, aurten Itxaso Martin Zapiainen "Punto Bobo" liburuaren aurkezpena egingo da Torrebillelan, martxoaren 27an, osteguna, arratsaldeko 19:00etan. Gainera, bisitariek "Urtemugak: Lauaxeta eta Aresti" erakusketaz gozatu ahal izango dute, bi poeta handiei liburu, argazki, poesia eta abestien bidez egindako omenaldiaz.
Liburuen sinadurak eta jarduerak
Asteburuetan, liburuak sinatuko dituzte idazleek, azken nobedadeak aurkezteko. Unean uneko erreferentziazko egileak ezagutzeko aukera paregabea.
Planetaren ordua
Bestalde, Mungiako Udalak iraunkortasunarekin eta klima-aldaketaren aurkako borrokarekin duen konpromisoa berretsi du, aurten ere, WWFk (World Wildlife Fund) sustatutako "Planetaren Ordua" ekimenarekin bat eginez.
Hala, datorren larunbatean, martxoaren 22an, 20:30etik 21:30era, udaletxeko eta Matxin plazako argiak itzaliko dira, energia-kontsumoa murrizteko eta ingurumena babesteko beharraz kontzientziatzea helburu duen keinu sinboliko batean.
Horrela, Mungiako Udalak ekintza global honekin bat egitera animatzen ditu herritarrak, bertako enpresak eta dendak, ordu horretan funtsezkoak ez diren argiak eta gailu elektrikoak itzaliz. Horrelako ekintza txikiek eragin positiboa dute gure ingurunean eta planetan.