Gerra-ospitaleetako erizain buru Mari Gagori eskainiko dio Barakaldok Serraltan sortutako kale berria

Barakaldoko Udalak gerra-ospitaleetako erizain buru izan zen Mari Gagori eskainiko dio Serraltako eremu berrian sortutako kalea. Barakaldar emakume bati egindako errekonozimendu berri hau 2017an osoko bilkuran aurkeztutako erregu bat betetzearen barruan kokatzen da. Erregu horren bidez, udalerrian sortzen ziren kale berriei emakume izena emateko konpromisoa hartu zen.

23 urte besterik ez zituela, Gago Barakaldoko Ospitaleetako erizainburu izan zen Gerra Zibilean, eta bere profesionaltasun, emate eta alaitasun handiagatik nabarmendu zen, artatu zituen soldaduen maitasuna bereganatuz. Horietako askok, osatu ondoren, esker oneko gutunak idatzi zizkioten frontetik.

Bere historia hiriko 10 erreferentzia-puntutan jarri berri diren memoria historikoaren paneletako batean islatzen da. Gerra Zibilean izan zuen paper garrantzitsuari omenaldi gisa, udalerriko kaleetako batek bere izena eramango du.

Andikollanoko goialdean garatzen ari den garapen berrian, kale berri bat sortu da, eta horri izena eman behar zitzaion. "Familiak eskatu digu Mariaren ordez Mari jartzeko, hurkoenek deitzen zioten bezala, eta, beraz, kalearen izen ofiziala Mari Gago izango da", azaldu du Gorka Zubiaurre Alkatetzako zinegotziak. Kale horrek, hasiera batean, 3 atari izango ditu.

Emakume izena duten kaleak

Udalak emakume barakaldarren papera nabarmentzen jarraituko du, hiriko hirigintza garapen ezberdinetan sortzen diren kale berriei emakume izenak jarriz. "Barakaldon eremu batean edo bestean garrantzitsuak izan diren emakume asko daude. Hori da Blanca Estrella Ruizen kasua, adibidez, Barakaldoko Emakumeen Etxeari izena emanez omenduko duguna ", gogorarazi du zinegotziak.