Jarduera ekonomikoa eta enplegua dira bizkaitarren ardura nagusiak

Aurrekoetan bezala, jarduera ekonomikoa eta enplegua dira bizkaitarren ardura nagusiak, Bizkaiko Foru Aldundiak aldizka egiten duen iritzi-azterlanaren arabera.

Azterlan honetan egiaztatu da, gainera, pandemia gainditu ondoren sanitateari eta osasunari buruzko gaiak, aurreko azterlanetan gizartearen kezka handienen artean bigarren postuan kokatu zirenak, orain % 8,8ko aipatze-atalasean daudela, eta beste gai batzuen atzetik daudela, etxebizitza (% 11,6) eta herritarren segurtasunik eza (% 10,5). Nolanahi ere inkestatutako pertsonek kalifikazio altua ematen diote lurraldeko bizi-kalitateari, eta hamar puntutik 7,76 puntu ematen dizkiote.

Aurtengo apirilaren 17tik 25era bitartean egindako 3.000 telefono-elkarrizketen bidez egindako iritzi-azterlan honek erakusten du, halaber, arlo ekonomikoan kezka egon arren arlo horretako egoeraren pertzepzioak 6,27 puntuko nota jasotzen duela. Enpleguaren egoerak jasotzen duen balorazioa zertxobait baxuagoa da -5,91 puntu-.

Prezioen igoeraren eta inflazioaren eraginari buruzko galdera zehatzak eginda inkestatutako hiru pertsonatik batek uste du eragin hori oso handia izan dela bere ekonomia pertsonalean, eta % 58k dio gutxienez nahiko handia izan dela. Izan ere, zero puntutik hamar puntura bitarteko eskala batean, non zerok ez dutela eraginik izan eta hamarrak inpaktua erabatekoa izan dela esan nahi duen, batezbestekoa 7,62 puntukoa da. Ildo horretatik pertsona horietako batzuek kontsumo-ohiturak aldatu behar izan dituzte:

• % 28,8k ziurtatu du mugitzeko eta ibilgailu pribatua erabiltzeko ohiturak aldatu behar izan dituela erregaiaren prezioaren igoeragatik.
• % 62,6k adierazten du derrigorrez erosketa-saskia aldatu behar izan duela.
• eta % 35,3k joan den Aste Santuan opor-planak bertan behera utzi edo maila jaitsi behar izan zuen.

Erakundeekiko konfiantza eta foru-kudeaketaren balorazioa

Bizkaiko Foru Aldundiak aldizka egiten duen azterlanak herritarrek erakundeekiko duten konfiantza ere aipatzen du. Atal honetan Bizkaiko Foru Aldundiak lortu du puntuaziorik altuena, hamarretik 6,46ko batezbesteko puntuazioarekin, Eusko Jaurlaritzaren (6,36) eta inkestatutako pertsonak bizi diren herrietako udalen (6,23) aurretik, eta nabarmen handiagoa Europar Batasunean (5,21 puntu) eta Espainiako Gobernuan (4,73) jartzen duten konfiantza baino.

Bizkaiko Foru Aldundiak egiten duen kudeaketari dagokionez inkestak adierazten du lurraldeko herritarrek 6,4 puntuko kalifikazioa ematen diotela.

Hauteskunde-prospekzioa

Ahaldun Nagusiarako hautagaiei dagokienez ezagutza-mailan ezagunena Iker Casanova da (EH Bildu) % 28rekin, eta beste aldean Vox alderdiko hautagaia den Niko Gutierrez daukagu, % 10,9arekin. Ahaldun Nagusiaren postura iristeko hautagaien kasuan Elixabete Etxanobe jeltzaleak lortzen du, 6,38 punturekin, puntuaziorik onena eta, ordea, Gutierrezek (Vox) jaso du puntuaziorik txarrena, 1,66 punturekin.

Hauteskunde-prospekzioa aztertuta azterlanaren datuen arabera EAJ-PNVk berriro lortuko luke emaitzarik onena, bai portzentajeari dagokionez, bai Bizkaiko Batzar Nagusietako ordezkaritzari dagokionez. Talde jeltzaleak botoen % 43,4 jasoko lituzke (2019ko maiatzeko hauteskundeetan baino hamarren bat gutxiago), eta horrela 25 eta 26 batzarkide artean lortuko lituzke.

Bizkaiko bigarren indarra EH Bildu izango litzateke, botoen % 22,1ekin (duela lau urteko maiatzean baino 1,2 puntu gehiago) eta 12 eta 13 batzarkide artean izango lituzke. PSEk 1,3 puntu galduko lituzke boto-portzentajean (botoen % 16,6 jasoko lituzke), baina Bizkaiko zortzi ordezkariei eutsiko lieke, eta Podemosek eta PPk ordezkaritza galduko lukete. Alderdi moreak 0,8 puntu egingo luke behera botoen egungo portzentajean (% 9,8an geratuko litzateke), hau da, bi ordezkari galduko lituzke, eta popularrek puntu erdi galduko lukete botoen ehunekoan.