Martxoan ospatuko da Meatzari-pintxoaren V. Ibilbidea

Abanto-Zierbenako Udalak ekimen berezi bat aurkeztu berri du. Aurreko edizioen arrakasta kontuan izanda, martxan jarriko du Meatzari-pintxoaren Ibilbidearen edizio berri bat, 'Ostegunak Abanto Zierbenatik' lelopean. Ekimen hau martxoaren 2tik 30era bitarteko ostegunetan ospatuko da, arratsaldeko 19.00etatik 21.00etara bitartean.

Edizio berri hau merkataritza eta turismo zinegotzi Alazne Zenekortak eta gazteria, hezkuntza eta euskara zinegotzi Iñaki Urrutiak aurkeztu dute, udaletxeko osoko bilkuren aretoan.

Zenekortaren hitzetan, “gure lehentasuna da gure herrietako ostalaritza sustatzen jarraitzea, herritarren kontsumoa handitzea eta Meatzari-pintxo markaren bidez ostalaritza indartzea”. “Ostalaritzak bizitza ematen die Abanto Zierbenako kaleei eta aukera ematen digu familiarekin eta lagunekin bat egiteko”, azaldu du gazteria, hezkuntza eta euskara zinegotzi Iñaki Urrutiak. Bestalde, Maite Etxebarria alkateak partaide guztiak zoriondu ditu “dena emateagatik, kalitatezko zerbitzua eskaintzeagatik, Abantoko ostalaritzaren aldeko apustua egiteagatik eta gure kaleak girotzeagatik asteburutik kanpoko egunetan, hala nola ostegunetan”.

Ostegunetik aurrera (martxoak 2), eta hilabeteko hurrengo ostegunetan (martxoak 9, 16, 23 eta 30), Abanto Zierbenako Meatzari-pintxoaren Ibilbideak kaleak girotuko ditu. Pintxoak ibilbidera atxikitako establezimendu guztietan dastatu ahalko dira. Ibilbidean parte hartu duten establezimenduek kanpainaren kartela izango dute atean edo sarreran. Informazio guztia eskuragarri dago udal-webgunean eta informazio-pantailetan. Era berean, herritarrak ibilbidea egiten animatzeko, kartilla bat izango dute eskura. Kartilla hori establezimendu bakoitzean zigilatuko da, eta ezingo dira errepikatu establezimendu bereko zigiluak.

“Gutxienez 8 zigilu desberdin bildu ostean, kartilla 5 euroko kontsumo-bonu baten truke aldatu ahalko dute, Abanto Zierbenako saltokietan gastatzeko. Horretarako, Tokiko Garapen Agentziara joan beharko dute eta kartilla beteta eraman”, azaldu du Alazne Zenekortak. Ostalaritza-lokal partaideak honako hauek dira:

Gallarta: Arlekin, Casa del pueblo, El Patio, J.R. I, J.R. II , Kenya berria, Mai Gau Txori, Meatza, Pasaje, Batzoki Gallarta, La bodeguita minera, cafeteria Max, Harrigorria kultur elkartea herriko Gallarta eta Argia jatetxea.

Sanfuentes: Sutea jatetxea.

Las Carreras: 1914, Haritzalde, Jubilados las carreras, Enparantza taberna eta Angulo jatetxea.