Astelehen honetan, azaroak 29, hasiera emango zaio Sarekin Week ekintzailetzaren astearen bigarren edizioari. Bertan, Bizkaian lanean diharduten eragile eta erakundeak bilduko dira.
Astelehenean kongresu bat egingo da, aurrez aurre eta online, eta ostiralera arte hainbat jarduera egingo dira 'streaming' formatuan. web orrialde honetan, ekintzailetzaren aste honi buruzko informazio guztia eskaintzen da. Informazio hori eskuratzeko, izena eman behar da helbide honetan.
Teresa Laespada Enplegua, Gizarte Inklusioa eta Berdintasuna sustatzeko foru diputatuak, zeina DEMA, Enplegu eta Ekintzailetza Foru Agentziako arduradun nagusia ere baden, jardunaldi honetan espiritu eta proiektu ekintzaileak dituzten pertsona guztiak parte hartzera animatu ditu, "Ehunekoen hoztasunaren atzean ilusioak, proiektuak eta enplegu-sorgune berriak daudelako".
"Ezin dugu onartu ekimen ekintzaile bideragarri bakar bat ere ez ernetzea babes faltagatik. Ez dugu onartuko. Eta horretarako, DEMA Agentzian eta zuzentzen dudan Sailean lanean jarraituko dugu. Eta, noski, Bizkaiko ekintzailetzarako Sarekin Sarearen lankidetzaren arloan sakonduz , gaineratu du.
KONGRESUA
Asteleheneko kongresua Iberdrola Dorrean egingo da, Ana Fernandez Laviada Espainiako Ekintzailetzaren Behatokiko presidentearen hitzaldi batekin. Halaber, Ekintzailetzaren Euskal Behatokiko lehendakari María Sáiz Santosek ere parte hartuko du.
Sarekin Week erakundearen eta haren eragileen eta erakundeen sarearen helburu nagusia da laguntzea, orientatzea, aholkuak ematea eta, azken batean, ekintzaileen ideiak eta enpresa-proiektuak aurrera ateratzen laguntzea.
Aste osoan zehar, online formatuan, 'Streaming' bidezko emisioarekin, ekintzailetzaren alorreko berrikuntzak partekatuko dira: merkatuaren joerak eta sortzen dituzten negozio-aukerak. Bost egun hauetan hitzaldiak, adituen tailerrak, mahai-inguruak eta lekukotasunak izango dira.
Edizio honetan, gainera, Aholkularitza Zerbitzu pertsonalizatua, espezializatua eta doakoa jarriko da izena eman duten pertsonen eskura. Horrela, Bizkaiko Sarekin Sarea osatzen duten ehun erakunde baino gehiagok ekintzaileei laguntzeko baliabide guztiak erabiltzen dituzte.
Sarekin Week topaketaren lehen edizioan, pandemia bete-betean zegoelarik, 68 hitzaldi baino gehiago, 30 ekitaldi, 1.740 bistaratze eta 175 matchmaking egin ziren. Guztira, 2.824 inskripzio izan ziren.
