BILBO. Bileren eta webgunearen bitartez biztanleen sektore guztien inplikazioa bilatzen da aipaturiko plana egiteko, planaren helburua baita hiri osasungarriagoa, eraginkorragoa eta iraunkorragoa egitea, bizi kalitatearen hobekuntzan islatuko dena.

Bilboko Udalaren arabera, hiri mugikortasun iraunkorraren plana elkarlanean egin da hasieratik eta eragile desberdinen partaidetza erabili da helburu bateratu batekin: herritarren, elkarteen, talde interesdunen eta administrazioen ekarpena gehitzea plana egiteko.

Alfonso Gil Bilboko alkateorde eta Mugikortasun Politiken, Etxebizitzaren eta Garapen Osasungarriaren koordinatzaileak azaldu duenez, plana elkarlanean eta partaidetzan egindako tresna da. "Adostasun politiko, tekniko eta soziala oinarri hartuta hiriko gure eredua sortuko dugu eta horrek gidatuko gaitu jasangarritasunaren, lehiakortasunaren eta berrikuntzaren bidetik", azaldu du.

Horrela, bada, webgune berria abian jarrita, herritarrek modu zuzenagoan parte hartzea eta planean inplikatzea bilatzen da. Hain zuzen, www.bilbao.eus/blogs/pmus/?lang=eu webgunea bost ataletan banatzen da: Sarrera, Lanketa prozesua, Parte hartze publikoa, Inkesta eta Lotura interesgarriak. Tresna berri horrekin plana egiteko prozesuaren inguruko eta partaidetza prozesua garatzeko moduari buruzko informazio guztia lor daiteke.

TOPAKETAK

Gainera, hiri mugikortasun iraunkorraren plana garatzeko aurreikusitako beste jarduketa mota bat herritarrekin eta talde interesdun zehatzagoekin egingo diren topaketak dira. Lehen topaketa astelehen honetan bertan egingo da Bilboko udaletxean, arratsaldean, eta garraio publikoaren eta pribatuaren ordezkarien talde interesdun batzuk mugikortasunarekin lotutako edo eragindako eragile ekonomiko eta sozialekin bilduko dira.

Halaber, asteazkenean, urriaren 26an, lehen topaketa irekia izango da. Bilera horretara barrutietako kontseilu guztiak deitu dituzte, eta Deustuko udal zentroan izango da, 19:30ean. Sarrera doakoa izango da parte hartu nahi dutenentzat.

Hiri mugikortasun jasangarriaren planaren helburua da garraio publikoaren eta merkantzien garraioaren eragikortasuna eta errentagarritasuna hobetzea, eta herritarren bizi kaliatearen hobekuntzan laguntzea, hiriko ingurumenaren kalitatea oinarritzat hartuta.