Uztailaren 8tik 11ra bitartean, Bilbao BBK Live jaialdiaren espiritua hiriaren bihotzera hedatuko da Bereziak ekimenari esker. 2011. urteaz geroztik, programa honek Bilboko hainbat gunetara hurbiltzen ditu hainbat kontzertu.
Bereziak ekimenak musikarekiko, kulturarekiko eta aniztasunarekiko konpromisoari eusten dio, eremuaren mugak gainditzen dituen eta herritarrekin bat egiteko gune berriak sortzen dituen programazioaren bitartez. Hogei urteko historia ospatzeko modu bat da, jaialdia hiriarekin partekatuta eta zuzeneko musika plazetara, aretoetara, gune berezietara eta, aurten, itsasadarrera ere eramanda.
Programazioa
Uztailaren 8an hasiko da programazioa, hitzordu berezi-berezi batekin: José Gonzálezek Guggenheim Bilbao Museoan eskainiko du kontzertua, sarrera guztiak saldu ostean. Artista suediar-argentinarra folk garaikidearen erreferente da, eta Bereziak kontzertuen inaugurazioan arituko da hiriko gune enblematikoenetako batean, musika, arkitektura eta memoria urbanoa bat eginez, Bilbao BBK Live jaialdirako bereziki esanguratsuak izango diren egunen hasiera markatuta.
Uztailaren 8an, asteazkenean, José Gonzálezek Guggenheim Bilbao Museoan eskainiko duen kontzertu bereziarekin hasi ondoren, Bereziak programazioaren doako lehen hitzordua uztailaren 9an,ostegunean, izango da BBK Aretoan. Bertan ariko da Belén Aguilera 13:00etan bere pop intimo eta autobiografikoa hirigunera hurbilduko duen eguerdiko hitzordu honetan.
Uztailaren 10ean, programazioa Bilboko hainbat tokitara zabalduko da. Areatzako kioskoan egongo den San Miguel agertokian Baliza pop-rock talde berria arituko da 12:30ean, eta Ana Curra, berriz, 14:00etan, Parálisis Permanente taldearen omenezko diskoa zuzenean aurkezten. Albiako lorategietako Johnnie Walker agertokian Las Petunias beti dibertigarri eta zuzenak 14:30ean hasiko dira, eta Isozaki dorreetako Vueling agertokian, aldiz, Raly gazte maratonianoaren txanda izango da 15:00etan. Berrikuntza gisa, Azulmarino agertokia itsasadarrera aldatuko da, itsasontzi formatuan, jaialdia uretatik aktibatuz esperientzia dinamiko batean; hiriko puntu ezagunenetariko batzuk ikusteko aukera izateaz gain, hala nola Bilboko Udala, Zubizuria, Guggenheim Museoa edo Iberdrola Dorrea, zuzeneko musika ere izango da: Gara Durán pop promesa berriak bi emanaldi eskainiko ditu, bata 12:30ean eta bestea 14:00etan, formatu berezian eta edukiera txikiarekin.
Uztailaren 11n, hiriak musikaz beterik jarraituko du doako kontzertu gehiagorekin. Areatzako kioskoko San Miguel agertokian, Calequi y Las Panteras arituko dira 12:30ean, funk eta erritmo latinoak fusionatuta, eta Merina Gris taldea 14:00etan, bere elektronika punkarekin. Albiako lorategietako Johnnie Walker agertokian, Las Bajas Pasiones taldearen pop eta rap nahasketa 13:00etan hasiko da, eta SVSTOren darkineoa, berriz, 14:30ean. Isozaki dorreetako Vueling agertokian, Teo Lucadamo eklektikoa 13:30ean eta Lablackie moldakorra 15:00etan izango dira. Azulmarino agertokia itsasadarrean barrena ibiliko da berriro joseluisen folklore berritzailearekin; bi emanaldi eskainiko ditu, 12:30ean eta 14:00etan.
Lau egunez musikak Bilboko hainbat espazio okupatu ostean, programazio bereziak hurrengo egunean jarraituko du Euskaraz! ekimenarekin; euskarari eta hizkuntza gutxituei balioa emateko eguna izango da, Bilbao BBK Live jaialdiaren 20. urteurrenaren ospakizun hedatu honi amaiera sinbolikoa emanez.
Bilbao BBK Live jaialdiak Bilboko Udalaren babesa du, beste erakunde eta entitate batzuekin batera.
