Martxan da aire zabaleko Pintura Azkarraren lehiaketaren bosgarren edizioa

Hemen da aire zabaleko Pintura Azkarraren lehiaketaren bosgarren edizioa. Aurreko edizioek izandako harrera bikaina kontuan izanda, Bilbao Zerbitzuak erakundeak martxan jarri du Bilboko Udal Hilerrian egoitza izango duen ekimen hau, ekainaren 13an ospatuko dena.

“Bilbao Zerbitzuak-ek sorkuntza artistikoa sustatzeko egiten duen apustu kulturalaren barruan kokatzen da lehiaketa hau, eta udal-hilerriaren adierazpen piktorikoa eta aberastasun historikoa balioestea du helburu”, azaldu du Álvaro Pérez Osasun eta Kontsumo zinegotziak.

Lehiaketa 8:30ean hasiko da eta 13:30ak arte iraungo du. Denbora tarte horretan, parte-hartzaileek jatorrizko obra bat egin beharko dute in situ, Bilboko hilerrian oinarrituta. Piezek hileta-artea islatu beharko dute, zentzurik zabalenean, eta arreta berezia jarri beharko dute monumentu-, arte-, paisaia- eta sinbolo-elementuetan, bai eta espazio horrek duen lasaitasun- eta harmonia-sentsazioan ere.

Parte hartu nahi dutenek izena eman beharko dute aldez aurretik, ekainaren 12ko 10:00ak baino lehen, Bilbao Zerbitzuak-en webgunean dagoen formularioaren bidez. Lehiaketaren egunean bertan, gainera, akreditazio aurrez-aurre jaso beharko dute, 08:30etik 10:30era, hilerriko bulegoetan.

Teknika librea

Parte-hartzaile bakoitzak obra bakarra aurkeztu ahal izango du, lehiaketa dirahun bitartean aire zabalean eginikoa. Teknika piktorikoa librea izango da — olio-pintura, akrilikoa, akuarela edo teknika mistoak —, eta kanpoan geratuko dira argazki-errealizazioak edo errealizazio digitalak. Era berean, obrak gutxieneko neurri batzuetara egokitu beharko dira, bai eta erakundeak aldez aurretik prestatutako eta zigilatutako euskarrietara ere. Aurreko edizioetan bezala, gutxieneko neurria 80x60 cm-koa izango da; eta akuarela bada, 50x30 cm-koa.

Sorkuntzak Hilerriko Kaperan entregatuko dira 13:30etik 14:00etara, eta une horretatik aurrera epaimahaiak, kultura eta arte arloko profesionalez osatua, lan irabazleak aukeratuko ditu. Epaia egun horretan bertan jakinaraziko da, 14:30etik aurrera.

Sariak

Lehiaketak hiru sari banatuko ditu lan onenen artean: 1.000 euroko lehen sari bat egongo da, 500 euroko bigarren sari bat eta 300 euroko hirugarren sari bat. Gainera, epaimahaiak 250 euroko accesita ematen ahalko du, egoki baderitzo.

Saritutako artelanak Bilbao Zerbitzuak-en arte bilduman sartuko dira, espazio horri lotutako ondare artistikoa aberasten lagunduz.