Osasunaren Munduko Egunarekin bat egin du Bilbok

Osasunaren Munduko Erakundeak aukeratutako 'Elkarrekin osasunaren alde, babes dezagun zientzia' lelopean ospatu da aurten Osasunaren Munduko Eguna. Urtero bezala, Bilboko Udalak bat egin du ekimenarekin.

Testuinguru horretan, aurten ere, Bilboko Udaleko Arabiar aretoa izan da osasunaren arloko erakunde eta profesionalak aintzatesteko lekua. Ekitaldiaren buru Amaia Arregi Bilboko jarduneko alkatea, Nora Abete alkateordea eta Álvaro Pérez Bilboko Udaleko Osasun eta Kontsumo Saileko zinegotzia izan dira.

Bertan, Bilboko 156 elkartek osasunaren arloan egiten duten lana ikusarazi eta eskertu nahi izan du Udalak, bai eta kolektibo horietan aktiboki parte hartzen duten dozenaka pertsonaren lana ere.

Sariak

Sari horien XV. edizioa da. Aurtengo saridunak izan dira Zorrotzako Gure Lurra elkartea, osasuna sustatzeko egindako lanagatik, Zubietxe elkartea, adikzioen arloan egiten duen gizarteratze-lanagatik, eta Retina Bizkaia Begisare elkartea, ikusmen urriko edo itsutasuneko arazoak dituzten pertsonen bizi-kalitatea hobetzeko lan egiten duena. Era berean, Sonia Gaztambide endokrinologoaren lanari aitortza berezia eskaini zaio, diabetesari buruzko sentsibilizazio-ekimenetan egindako lankidetza-ibilbide luzeagatik eta egindako ekarpen adituagatik.

Omenaldi horren bidez, Udalak, beste behin ere, osasun komunitarioarekin duen konpromisoa berresten du. Esparru horretan, Osasun eta Kontsumo Sailaren bitartez, irabazi-asmorik gabeko elkarte eta entitate horiek osasuna sustatzeko, prebenitzeko eta gizarteratzeko garatzen dituzten programa ugari babesten ditu.