Bost atxilotu Bilbon drogra-trafikoagatik

Bilboko Udaltzaingoak bost pertsona atxilotu ditu osasun publikoaren aurkako delitu batean ustez parte hartzeagatik, Bilboko San Frantzisko auzoko etxebizitza batean substantzia estupefazienteak saltzeko gune bat desegin ondoren. Operazioa bi hilabete baino gehiago iraun duen polizia-ikerketa baten emaitza da.

Ikerketak joan den abenduaren 15ean hasi ziren. Bizilagun batzuk kexatu egin ziren, inguru horretako etxe batean itxuraz substantzia estupefazienteak salerosten zirela-eta. Informazio horretan oinarrituta, Kriminalistikako Ikuskaritzak zaintza-dispositibo bat ezarri zuen, droga banatzeko puntu aktibo bat zegoela egiaztatzeko.

Ikerketa

Bi hilabete eta erdi inguruan, agenteek kokainaren salmentarekin lotutako transakzio ugari ikusi zituzten. Gutxienez sei gizonek parte hartzen zuten, 18 eta 34 urte bitartekoak. Ikerketen arabera, inplikatuek hainbat funtzio betetzen zituzten legez kanpoko jardueraren barruan, hala nola substantziaren zuzeneko salmenta, zaintza-lanak, eta kontrazaintza-lanak poliziaren presentzia detektatzeko.

Taldeak, gainera, hainbat neurri hartu zituen poliziaren jarduna zailtzeko. Besteak beste, eraikineko leihoetatik zaintzeaz arduratzen ziren pertsonak zituzten. Beste batzuek erosleei jarraitzen zieten, batzuetan patinete elektrikoekin, polizia erosleen atzetik zebilen jakiteko.

Legez kanpoko jarduera egiaztatu ondoren, joan den martxoaren 4an, ikertutako etxebizitzan sartu eta miatzeko baimen judiziala eskatu zuen Udaltzaingoak. Miaketan, agenteek 3,7 kilo marihuana aurkitu zituzten, lau poltsatan banatuta eta maleta baten barruan ezkutatuta. Konfiskatutako substantziak 20.000 euro inguruko balioa izango zuen legez kanpoko merkatuan.

16 gramo haxix

Halaber, 16 gramo haxix aurkitu zituzten, dosi txikitan, saltzeko prest. Era berean, substantzia pisatzeko erabilitako hiru doitasun-baskula, hainbat bitxi, 750 euro (50 euroko billetetan), polizia-defentsarako bi spray eta komunikazio-emisora bat konfiskatu zituzten.

Esku hartzeko unean, kokainaren salmentan ustez inplikatutako lau pertsona atxilotu zituzten agenteek -beste biak ez zeuden etxean-. Ondoren, bosgarren pertsona bat atxilotu zuten, 45 urteko gizon bat, ustez etxean atzemandako substantziarekin lotuta zegoena.

Ikerketak irekita jarraitzen du, eta ez da baztertzen ikertutako gertakariekin lotutako polizia-jarduketa gehiago egitea.