Urtero bezala, Bilboko Udalak bat egin du aurten ere bai igande honetan, azaroaren 30ean, ospatzen den Hiri Hezitzailearen Nazioarteko Egunarekin, haren oroitzapenarekin, haurrek eta nerabeek herritar aktibo gisa duten funtsezko eginkizuna aitortzeko konpromisoarekin, iritzia emateko eta entzuna izateko eskubidearekin eta eragiten dieten erabakietan parte hartzeko eskubidearekin, eta hezkuntza eraldaketa sozialaren, gizarteratzearen eta bizikidetzaren eragile gisa ulertzeko konpromisoarekin.
Eider Bilbao Bilboko Hezkuntzako zinegotzi delegatuak azaldu duenez, "Bilbon lan egiten dugun Hiri Hezitzailearen estrategiaren barruan, hezkuntzak eskolako hormak gainditzen ditu hiri osoa bustitzeko. Herritarren hezkuntza da, non administrazio guztiok gure gain hartzen dugun hiria errespetuzko eta askotariko espazio bihurtzeko dugun erantzukizuna".
Hiri Hezitzaileen Elkartea da egun honen bultzatzailea, hezkuntzarekin konprometitutako 500 tokiko gobernu inguru biltzen dituen sarea, gizartea eraldatzeko, gizarteratzeko eta elkarbizitzarako motor gisa, eta horien artean dago Bilbo 2000. urtetik. 2025 urte honetan, ospakizunaren leloa «Haurren parte-hartzea Hiri Hezitzailean» da, non haurtzaroa ez baita soilik zerbitzuen hartzaile, orainaren protagonista eta etorkizunaren eraikitzaile baita. Haien inplikazioak, sinbolikoa izan beharrean, eragin erreala eta eraldatzailea du herritarren bizitzan. Alde batetik, beren proposamenek eragina dute udal-erabakietan, eta aberastu egiten dituzte beren begiradarekin, ideiekin eta energiarekin; eta, bestetik, parte hartzean demokraziak nola funtzionatzen duen ikasten dute, berehalako errealitate batetik abiatuta, eskola edo auzoa kasu.
Hezkuntza Arloa "Patioak birpentsatuz: Bilboko haur eta lehen hezkuntzako ikastetxeetarako patio inklusibo, berde eta irekien kontzeptualizazioa " gida lantzen ari da. Tresna horren bidez, ikastetxeei lagundu nahi zaie jolastokia erabiltzaile guztien artean modu parte-hartzailean diseina dezaten: ikasleak, irakasleak, irakasle ez diren langileak, familiak, komunitatea. Prozesuan zehar, Bilboko egungo eskola-jolastokiak inklusibo, berde, ireki, ludiko eta hezitzaile bihurtzeko beharrezkoak diren zer, nola, non eta noiz kontzeptualizatzea eta definitzea bultzatzen da, hiriko gizarte- eta ingurumen-azpiegitura gisa. "Bilbo lanean ari da hezkuntza-eredu integralagoa, eraginkorragoa, komunitarioagoa eta bidezkoagoa bultzatzeko. Haurrek eta nerabeek prozesu horietan parte hartzea da gure apustuetako bat. Espazioak "hirugarren maistra" gisa berrirudikatzea (irakasle eta familiaz gain) demokraziarako eta partaidetzarako eskola bat eraikitzea ere bada ", adierazi du Hezkuntza zinegotziak.
2025eko Hiri Hezitzailearen Nazioarteko Eguna ospatzeko ekitaldien barruan, Bilbok bat egiten du Adierazpen Instituzionalarekin. Aukeratutako leloaren ildotik, haur eta nerabeen begiradan jartzen du arreta, herritarren bizitza eraldatzeko elementu gisa.
"Ospakizun hau aukera ona da Bilbok eskaintzen dizkigun ikasteko aukerei buruz hausnartzeko. Bilboko Udaleko Hezkuntza Sailetik herritarren heziketarekin eta etorkizun hobe baten eraikuntzarekin dugun konpromisoa berresten dugu "amaitu du Eider Bilbaok.
