Beste urte batez, Bilborock aretoko eszenatokia 'La Muestra de Metal, Pop-Rock Aste Nagusia' erakustaldiaren egoitza izango da abuztuaren 16tik 23ra bitartean. Guztira 16 talde igoko dira eszenatokira, zortzi kontzertu bikoitzetan.
Berdintasun eta Jaietako zinegotzi Itziar Urtasunek, programazio-taldearekin eta tokiko taldeekin batera, aurtengo La Muestran parte hartuko duten artistak eta taldeei buruzko xehetasun guztiak aurkeztu ditu.
Ohikoa den bezala La Muestran, egunero bi kontzertu egingo dira: lehena 20:00etan hasiko da, eta hurrengoa ordubete geroago, 21:00etan. Sarrera librea izango da, lekua bete arte.
La Muestrak beti izan du bereizgarri “irekitasuna eta genero-aniztasuna”, eta estilo ugariko eskaintza zabala egiten du: metal, punk, hard rock, folk, blues, soul, rap, pop-rock, eta abar.
Udalak berretsi du bere konpromisoa “denek gozatzeko moduko ikuskizuna eskaintzeko, eta, gainera, agian ezagutzen ez zituzten artista berriak ezagutzeko aukera emateko”, adierazi du Itziar Urtasunek. Horrez gain, honakoa gehitu du: “bertako talentuari eta Bilbo zein Bizkaiko musika eszena bizirik mantentzen saiatzen diren taldeei ikusgarritasuna eta proiekzioa emateko modua ere bada. 38 urte hauetan ia 600 talde eta artista igaro dira agertoki honetatik, eta askok ibilbide arrakastatsua lortu dute”.
85 talde eta artista izena emanda
Aurtengo edizioan, 85 talde eta artistak eman dute izena, eta parte-hartzeari dagokionez, zortzigarren edizio jendetsuena bihurtu da. “La Muestra hitzordu finkatua da Urian eta Aste Nagusian. Izena emateko epea noiz zabalduko den irrikaz itxaroten da, eta oso balorazio ona dauka musika eszenan. Hori urtero aurkezten diren proiektu kopuruak erakusten du argi eta garbi”, adierazi dute Udaletik.
Datuen arabera, izena eman duten taldeetatik % 47,06 Bilbokoak dira, eta gainerako % 52,94 Bizkaiko Lurralde Historikoko beste herri batzuetan bizi dira. Izena eman duten talde guztien artean, 23k euskara erabiltzen dute adierazpen-hizkuntza gisa, eta 22 taldek emakumeak dituzte beren kideen artean.
Udaletik nabarmendu dute aurten aurkeztu diren taldeen kalitate handia eta edizioaren eklektikotasuna: “Aukeraketa lan neketsua eta oso zaila izan da, izena eman duten talde eta artisten kalitate eta ibilbide bikainagatik”. “Talde askoren iraupena eta etengabeko ahalegina lan berriak aurkezteko oso garrantzitsua eta itxaropentsua iruditzen zaigu etorkizunari begira”, azpimarratu dute.
Aurten La Muestran parte hartzeko aukeratu diren 16 taldetatik, bostek euskara erabiltzen dute beren letretan, eta zazpik emakumezko kideak dituzte, 2024an bezala. Jatorriari dagokionez, bederatzi talde eta artista Bilbokoak dira, hiru Ezkerraldekoak, bi Eskumaldekoak, bat Astrabudukoa eta beste bat Basaurikoa.
Oraingo honetan, Epaimahai espezializatuak Reeler taldearen presentzia nabarmendu du; taldea Ingalaterrako, Irlandako, Poloniako eta Bilboko kideez osatuta dago, eta Bilboko Udaleko Gazteria Sailak antolatzen duen Villasound 2025 lehiaketatik dator.
16 kontzertu 8 gauetan Bilborocken
Abuztuaren 16an, Bilborock aretoaren atea Elektrika taldearen punk-rock alternatiboarekin eta Jardín Infiernorenhard rockarekin irekiko da. Abuztuaren 17an (igandea) eta 18an (astelehena), euskara izango da protagonista oholtzan: lehenik Lur Jota taldearen rockarekin eta ondoren Deiedraren folk rebeldearekin; eta gero, oholtza guztiz femeninoan egongo dira Lova Lois, rap, soul eta poesiaren nahasketa batekin, eta Maialen Ibarra bere pop-rock dotorearekin.
Jaia abuztuaren 19an jarraituko du, Flor y Trol taldearen pop & troll eta The Daltonicsen pub rockarekin. Abuztuaren 20an, Aste Nagusiaren erdia osatzeko, Meridian taldeak bere rock alternatiboa eskainiko du, eta Clara Corral & The Cute Canallas taldeak bere pop-rock "canalla". Jaiak ez dadin apaldu, abuztuaren 21ean beste saio bikoitz bat izango da: Samoah taldearen rock alternatiboa, eta Reeler —VillaSound 2025eko irabazleak— pop-rocka.
Eta azken asteburuan, Bilborock Aretoan soilik rock metalaren soinua entzungo da. Abuztuaren 22an, Withredd taldeak rock metal progresiboena eskainiko du, eta Ms. Misseryk nu metalaren zertzeladak emango ditu. Programak amaiera emango dio abuztuaren 23an, Malamuth taldearen alt rock metalarekin eta Kernhell taldearen heavy metalarekin.
