Bilbo. Juan Mari Aburto Alkateak hala eskatuta, Udalak bilbotarrei aukera emango die bertoko kale, bide publiko eta plazetarako izendapen berriak proposatzeko.Herritarrentzako partaidetza prozesua astelehenean, urtarrilaren 25ean abian jarriko da eta 2016 otsailaren 10era arte luzatuko da.

Proposamenak posta elektronikoz participación@ayto.bilbao.eus helbidera bidali behar dira, edo idatziz aurkeztu San Agustin Eraikineko eta Barrutiko bakoitzeko Udaltegietako Herritarren Arretarako 10 bulegoetako Erregistroetan.

Horretarako, proposamenaren egilearen identifikazioa, emandako izendapena eta izen horren azalpena edo jatorria adierazi behar ditu. Izendapenak bildu ostean, Udalbatzak horiek aztertu eta zerrenda bat prestatuko du. Hura izango da Bilboko kale, bide publiko eta plazei izendapen berria emateko oinarria.

Prozedura erraza

Parte hartzeko prozesu honetan, herritarrez gain, alderdi politikoak ere egongo dira, Alkateak pasaden asteazkenean alderdietako bozeramaileei jakinarazi zien moduan; bide eta espazio publikoak izendatzea agintari honen esku dagoen eskuduntza izan arren.

Memoria Historikoaren Legea dela eta, Bilboko kale-izendegia aztertu da. Lehendabizi, hurrengo aldaketa biak egingo dira: Espainiako Printzeak zubia izenaren ordez La Salve Zubia proposatu dute, izan ere, jendeak hala ezagutzen du, eta Aita Remigio Vilariño kalea.

PARTE HARTZE PROZESUA, hain zuzen, bigarren kale horrekin hasiko da. Horretarako, Alkateak bost izendapen proposatu ditu, dagozkion azalpenekin.

JULITA BERROJALBIZ BERROJALBIZ. Irakaslea, Bizkaiko ikastola-mugimenduaren sustatzailea eta Loiuko Lauro Ikastolaren eratzaileetakoa. Ajangizen (Bizkaia), 1923ko otsailaren 19an jaio eta Bilbon hil zen, 1998an.

BENITA ASAS MANTEROLA (Donostia 1897- Bilbo 1968). Irakaslea. Emakumeen eta gizonen arteko berdintasunaren aldeko Ekintzaile Feminista.

ADELINA MENDEZ DE LA TORRE (Asturias 1871 ? Bilbo 1960). Bilboko irakaslea eta eskolako zuzendaria. Bilboko lehenengo eskola-jantokiaren sortzailea eta eskola-osasunaren nahiz hainbat berrikuntza pedagogikoren sustatzailea.

JUANITA MIR GARCIA (Iruñea 1905 ? Bilbo 1937). Kazetaria eta ipuin, kontakizun eta antzezlanen idazlea. 1937an fusilatua, "subertsio gorri eta separatistaren propagandista" izatea eta "Movimiento" delako erregimenaren aurkako ideiak zabaltzea leporatuta.

BIZENTA MOGEL ELGEZABAL (Azkoitia 1782 ? Bilbo 1854). Lehenengo euskal emakume idazletzat, euskal literaturara ere fabularen generoa ekarri zuen lehenengo idazletzat eta euskarazko Ume eta Gazte Literaturako lehenengo egiletzat hartutakoa.

Udalak proposatutako bost izen horiez gain, bilbotarrek eta alderdi politikoek emandakoak egongo dira.