Aburto Gastrotxikiko lehen egunean parte hartu duten umeekin egon da
Lehen eguneko protagonista entsalada izan da, baina Areatzak aire zabaleko sukaldaritza-gela izaten jarraituko du abuztuaren 20an eta 22an
2025eko Aste Nagusiak berriro ekarri du umeentzako sukaldaritza-giro berezia Gastrotxiki programaren bidez. Gastronomia Lehiaketaren baitan antolatzen diren tailer hauetan, txikienek sukaldean aritzeko aukera dute. Gaur goizean, lehen jardunaldian, Juan Mari Aburto Bilboko alkatea Areatzara bertaratu da, ikasleei gaurko proposamena prestatzen laguntzeko: entsalada fresko eta koloretsuak.
Alkatearekin batera izan dira Kontxi Claver, Ekonomiaren Garapeneko, Merkataritzako, Turismoko eta Enpleguko zinegotzia, eta Aitor Argote, Mercabilbaoko zuzendari nagusia. Aburtok azpimarratu du Gastrotxiki programak balio handia duela tokiko gastronomia belaunaldi berriengana hurbiltzeko, eta garrantzitsua dela txikitatik transmititzea, nortasunaren eta tradizioaren parte izateaz gain, autonomia eta sormena garatzeko aukera ematen duelako.
Lehen eguneko protagonista entsalada izan da, baina Areatzak aire zabaleko sukaldaritza-gela izaten jarraituko du. Abuztuaren 20an haurrek fruta-broxetak prestatuko dituzte, eta abuztuaren 22an, berriz, gildak, beti ere fruta, barazki eta hurbileko elikagaien kontsumo osasungarri eta kontzientearen aldeko proposamen gisa.
Mercabilbaok ez du hutsik egin aurten ere Aste Nagusiko sukaldaritza-ekimenarekin. Urtero bezala, elikagai freskoak, sasoikoak eta hurbilekoak jarri ditu umeen esku, prestatutako errezetetan erabiltzeko. Horrela, elikagaien banaketa-zentroak berriro berretsi du gaztetatik elikadura osasungarriagoa, kontzienteagoa eta jasangarriagoa sustatzeko konpromisoa, eta jaten dugunaren eta produktuen jatorriaren arteko lotura zuzena indartu du.
Gainera, Mercabilbaok umeen elikaduraren inguruko hezkuntzan jarri du arreta, balioak txikitatik landuz gizarte eraldatzaileagoa eraikitzeko tresna gisa ulertzen baitu ekimen hau.