Koronabirusaren krisiaren ondorioz

Premia bereziak dituzten ikasleen online bidezko probak egokitu ditu EHUk

01.06.2020 | 11:33

BILBO. Koronabirusaren krisialdiak hezkuntzan eragin ditzakeen aldaketak argitzeko helburuarekin, Euskal Herriko Unibertsitateak 'Online ebaluazio probetarako hezkuntza premia bereziak dituzten ikasleen arreta' izeneko gida zabaldu du. Ekimen hau unibertsitatearen Ezgaitasunak dituzten Pertsonentzako Zerbitzuak abiarazi du, EHU edonondik esparruaren barruan. 

Gidak irakasleentzako hainbat aholku praktiko jasotzen ditu, labur, online modalitateko ebaluazio probetan egokitzapenak aplikatzeari buruz. Helburua da unibertsitateko irakasleei jardunbide egokien gako batzuk ematea, hezkuntza premia bereziak dituzten ikasleek online azterketetan dituzten beharrei erantzuteko.

Ane Amondarain Euskal Herriko Unibertsitateko desgaitasun teknikari arduradunak honako hau azpimarratu du: "Gida hau campus birtualarekin koordinatuta egindako lanaren emaitza izan da, alde batetik, Blackboard Collaboratte plataformaren irisgarritasuna eta erabilgarritasuna bermatzeko, eta, bestetik, ikasgela birtualak inklusiboak izan daitezen".

Gaur egun, 1.000 irakasle baino gehiago ari dira online azterketetan egokitzapenak egiten eta beharrezkoak diren laguntza neurriak aplikatzen. Ane Amondarainek adierazi duenez, "Gure ustez, irakasleak funtsezko piezetako bat dira unibertsitatean desgaitasunak eta/edo hezkuntza premia bereziak dituzten ikasleen inklusioa arrakastaz lortzeko".

Ikasle horien ezaugarriak askotarikoak eta heterogeneoak dira; beraz, egokitzapenak desberdinak eta espezifikoak dira kasuan kasu. Eta hau esanez amaitu du: "Ebaluazio probetan galdetegiak erabiltzean, horien konfigurazioa bera funtsezkoa da ebaluazio-proban sarbide oztopoak kentzeko. Ebaluazio probetan ehuneko denbora gehigarria izatea da ikasleek gehien eskatzen duten egokitzapena, baina badira online ebaluazio probetan bestelako baliabideak erabiltzen dituzten ikasleak ere (zeinu hizkuntzaren interpretea edo hezkuntza laguntza langileak,esaterako)".

noticias de deia