Usurbil - 2015eko Kilometroak jaiak badu dagoeneko abestia eta atzo aurkezpena egin zuten Usurbilgo Potxoenea kulturgunean. Herriko hainbat musikariren artean osatu dute, Jakoba Errekondoren hitzak oinarri hartuta.
Errekondok adierazi zuenez, ezagutu zuenean Gattunk izango zela aurtengo Kilometroak ekimenaren leloa ezin hobea iruditu zitzaion. ”Nik Gattunk leloa hartu eta Lotzen hitza jarri diot izenburua lortzeko”.
“Abestiaren letra, bi ideia nagusiren ildotik dator: batetik, komunitaterik gabe ez dagoela hizkuntzarik, eta bestetik, heldu diogulako eta bertara josi garelako, (h)ari garelako bada hizkuntza”, esan zuen. Errekondok azaldu zuenez, komunitatea emea da: “Baloreen transmisioa, kulturarena, hizkuntzarena baita ere emea da. Hortik bertako, Usurbilgo hika emearen, nokaren aditzen erabilera: Zitxatoztilakoan, genitxatoztinan, gatoztin”.
Ixak Arruti eta Labrit Zabala musikariek azpimarratu zutenez, herriko musikariek sortu dute abestia: “Bakoitzak bere ideiak elkarbanatu ostean, abestia osatzeari ekin genion. Aipatzekoa da,abestiaren letrak shock egoeran utzi gintuela hasiera batean, ezohikoa eta irregularra baita, baina hori guztia gaindituta, letraren magiak bizia hartu zuen”.
Abestiaren sortze prozesua esperientzia berria izan da musikarien-tzat, haiek aitortu zutenez: “Dena izan da berria guztiontzat, ez baikenuen sekula elkarrekin jo; hortaz, hasierako pausuetatik estudioko orduetaraino, gozatu egin dugu elkarrekin”.
Ahotsetan Kilometroen sorreratik orain arteko esentzia islatzen da, adin guztietako jendeak parte hartu duelako. Nola ez, Udarregi ikastolako ikasleek ere parte hartu dute prozesu honetan. Haurrak Jaione Eskuderoren ikasleak dira.
Bestalde, Ikastolen Elkartearen ordezkariak, Eñaut Telleriak, gogoratu zuenez, urriaren 4an izango da Kilometroak jaia Usurbilen. Telleriaren arabera, usurbildarrek “urrats bat harago” eraman nahi dute Kilometroak jaia: “Udarregi ikastola garatzen ari den Hezkuntza Proiektu berria bultzatzeaz gain, 2015eko Kilometroetan auzolanean, inklusibitatean, jasangarritasunean eta parekidetasunean sakontzeko lehen harriak jarri nahi dira; harri horien gainean eraiki nahi dugu, pixkanaka, usurbildarrontzat, gipuzkoarrontzat eta euskal herritarrontzat desio ditugun hezkuntza eta herri eredua”. Horiek dira, beraz, Usurbilgo Kilometroen jaia sustengatuko duten bost zutoinak.
Aurkezpenean Mariaje Imazek, ikastolako zuzendariak, eta Mertxe Aizpurua, alkateak, parte hartu zuten eta biek Kilometroak “auzolanean” antolatzen ari direla azpimarratu zuten.
Gattunk, Gattunk
lotzen gattun harira
Gattunk, Gattunk
lotzen gattunk, lotzen gattunk
Hariketan ari
Harik eta behar den artean ari
artean arin
Gattunk, Gattunk... (berriz)
lokarri listari sokari hari
Gattunk, Gattunk... (berriz)
Hari artean, hari tia hari tira
Hari artean, ahalari tiraka
Hari artean, hariari tiraka ari
Hari artean, hari ariketa
Hari artean, hari ariketa
Hari artean, hari tira hari tira
Ahalari tiraka, hariketa hariketa
Hari gattunk, ari gattunk ttunk
Hari gattunk bagattunk ari
Hari gattunk ari gattunk
Bagattunk hari
hari gattunk gattunk
Lotu josi heldu
Bai bagattunk
ba ote goaz goaztean
Zitxatoztilakoan, genitxatoztinan,
gatoztin bai bagattunk
ba ote goaz
Zitxatoztilakoan, genitxatoztinan,
goaztean
