Jaurlaritzak 500.000 euro bideratuko ditu UNEDek EAEn dituen zentro elkartuen jarduera finantzatzera

Eusko Jaurlaritzako gobernu kontseiluak 500.000 euroko zuzeneko diru laguntza onartu du UNED Urrutiko Hezkuntzako Espainiako Unibertsitateak Euskal Autonomia Erkidegoan (EAE) dituen hiru ikastetxe elkartuen jarduerak finantzatzeko, Zientzia, Unibertsitate eta Berrikuntza Sailak proposatuta.

Jaurlaritzaren arabera, aurrekontu sail izendun hori Euskadiko 2025erako Aurrekontu Orokorrei buruzko 8/2024 Legean sartuta zegoen, eta Lakuako Gobernuak eta UNEDek 2021eko apirilaren 29an sinatutako hitzarmenaren barruan dago. Hitzarmen hori joan den martxoan berretsi zuen jarraipen batzordeak.

Zientzia, Unibertsitate eta Berrikuntza Sailak uste du prestakuntza eta ezagutza garapen sozial eta ekonomikorako "gakoak" direla, eta "unibertsitate sistema koordinatua, lehiakorra eta kalitatezkoa" defendatzen du.

Sailaren politikak unibertsitateko eskaintza euskal gizartearen beharrekin lerrokatzea du helburu, eta, alde horretatik, UNEDek askotariko inguruabarrak dituzten pertsonei unibertsitatera sartzea errazten die, bere hezkuntza ereduari esker.

UNEDek hiru zentro elkarturen bidez lan egiten du EAEn, eta zentroon ekarpen akademiko, kultural eta sozialak gobernuaren babesa du, bi erakundeek helburu bera baitute, hau da, unibertsitate sistemaren kalitatea hobetzea eta baliabide publikoen erabilera optimizatzea.

Horrela, ikastetxeak finantzatzeko zenbatekoa, neurri handi batean, aurreko ikasturtean matrikulatutako ikasle kopuruaren arabera ezartzen da, eta onartutako zuzeneko diru laguntza honela banatuko da: Bergarako ikastetxearentzat 131.760 euro, Bizkaiko ikastetxearentzat 242.236 euro, eta Gasteizko ikastetxearentzat 126.004 euro.

Ikastetxeen jarduerei eusteko, beharrezko azpiegiturak hobetzeko eta mantentzeko, eta UNEDeko ikasleek tutoretza telematikoa EAEko bi hizkuntza ofizialetako edozeinetan jasotzeko neurriak aplikatzeko erabili beharko da finantzaketa.