Zirrikituetatik begira

Subiranotasuna

28.07.2020 | 00:11

ESPAINIAKO Erresuman nazio ez-nazionalista izateko, hedabideek erakusten duten erasotuen sumindura deigarria egiten zait. Igandean bertan, Britainia Handiak Espainiatik datozenei berrogeialdia ezartzeko aginduak zalaparta sortzea normala da, ez, ordea, suminduaren tonua ez eta Britainia Handiaren kontrako akusazioa: "Eta zuek zer, gu baino txarrago zaudete eta?!"; hango kutsatze tasak, hemengoak baino txikiagoak dira eta komeni zaien erabakia hartzeko eskubidea dute. Cuatron albistegi burua izan zen, eta denbora asko eskaini zitzaion; eldiario.es bezalako egunkari orekatuan, titularraren azpian, Britainia Handiko datu txarrak azpimarratzen ziren. Kazetariak eta albiste entzule-irakurleok erasotuak sentitzen dira (gara?) zergatik eta beste nazio bateko agintariek bere populazioa denfedatzeko (ustez) erabakia hartu izanagatik. Bigarren mailan gelditzen dira, Cuatroko albistegian bezala, kalean denok jakin badakiguna: gauzak gaizki egiten ari direla, bereziki, ernealdiak kontrolatzeko aztarnirik ez dagoelako, kutsatuen kontaktuen 0-3 bitartekoari baino jarrai-tzen ez zaiolako, eta urteetako murrizketen ondoren zoragarria omen den gure osasun sistemak ez duelako gehiagorako ematen.

Espainiarroi, eta horretan EAE eta nafarrok espainiarrak gara, kostatu egiten zaigu Europako hondartza baino ez garela onartzea, gure modernitate nahiak bultzatuta Europa besarkatu genuenetik, Alemaniaren morroi izatera kondenatuta gaudela, eta aurreko krisitik aipatzen zen "eredu produktiboaren aldaketa" desideratum hutsa baino ez dela, Alemaniari, berriz ere, hondartza izaten jarrai dezagun interesatzen zaiolako; hartara, autoak ekoizten, edo, zientzia ikerketan hasteko agintarien asmoak irribarretxo batekin jasotzen ditu Bundensbankeko presidenteak, Jens Weidmann jaunak.

Gero Kataluniaren auziaren harira subiranotasuna aipatuko dute, noiz eta subiranotasuna aspaldi gelditu zenean Europaren eskuetan, eta Europarena, enpresa handienetan. Ezer gutxi egin dezake Pedro Sanchezek Britainia Handiaren moduko erabakien aurrean, eta gutxiago Espainiako Erresumak eredu produktiboa aldatzeko ahaleginean. Ez dago bere esku. Hondartza izaten jarraituko dugu. Aber eguraldiak laguntzen duen.

Más información

noticias de deia