Talaieroa

Begiratuen okerra

16.06.2020 | 00:24
Begiratuen okerra

Polizia batek beltz bat hiltzearen ondorioz, Ameriketako Estatu Batuetan sortu den protestaldiaren arrimuan, hasi dira, besteak beste, pelikulak bazter daitezen eskatzen eta kaleetan dauden estatuak eraisten. Arrazakeria islatzea edota sustatzea omen da halako eskakizunetarako eta jarraibideetarako arrazoia... Eta norabide berean urratsak eginez gero, ez dakit, laster, herrietako plazetan ez ote ditugun sasoi bateko idazleen obrak erretzen ikusiko, idazle horiek bizitzan zehar erakutsi zuten jarrerarengatik, izan zuten jokabideagatik edo idatzi zutenagatik. Nolanahi ere, zalantza handiak ditut halakoek gizarte batzuen iri-tzia benetan aldarazten lagunduko ote duten.

Beste horrenbeste esan dezaket halako obrak testuinguruan kokatu beharraz azalpenak, ohar edo iruzkinak gehitzeari buruz egin diren proposamenen inguruan. Sexuagatik, koloreagatik, aukera sexualengatik eta abar lagun hurkoarekiko herra erakusten duena ez da iritziz aldatuko halako azalpen batzuk irakurtzeagatik, seguruenik, atal hori ezabatu edota albait arinen igaroko baitu. Aitzitik, beste ikuspegi irekiagoa duenak, jakingo du bere balioen, iritzien eta jarreren arabera, aurrealdean daukan hori balioesten eta garai bateko testuinguruan kokatzen.

Nago, egungo begiekin, balio zein bestelakoekin, sasoi bateko gertakizunak aztertzen eta gaitzesten ohituegi gaudela, horrek halako nagusitasun moral eta etikoa ematen digulakoan, dezakegunari ateak ixten eta itxurakerietan murgiltzen laguntzen digun bitartean. Hobe genuke iraganari baino egungo gizarteetan egin beharko genukeenari erreparatuko bagenio, iltzatzen joan diren desberdintasunak orekatzen saiatuz, bazterkeria oro alboratuz, aukera berdintasuna sustatuz eta abar. Bizi eta gainerakoei bizitzen laga, betiere, guzti-guztion eskubideak errespetatuz eta goiburuan ditugula... Eta ohar gaitezen bihar-etzi izango diren belaunaldiek orduko begiekin epaituko gaituztela eta gaur egun guretzat segurua dena zalantzan jarriko dutela!

Arrazakeriari, jarrera totalitarioei eta abarri aurre egin ahal izateko daukagun modurik eragingarriena halakoak sorrarazten dituzten arrazoietan sakontzea eta konponbideak bilatzea da. Pertsonek gizartea behar eta bizi dute eta denon artean egin behar ditugu ahaleginak elkarrekin bizitzeko, bai eta elkarrekin bizitzen ikasteko ere... Baina ez dakit gainera datorkigunak, hots, krisi ekonomiko latzak, horretan lagundu edo bakoitzak bere zilborrari begira ibiltzeko eta gainerakoak bazter-tzeko joera indartuko ez ote duen.