Musikaren magia

Alaba nagusiari, sei urtekoari, Errege Magoek musika entzuteko kaskoak ekarri zizkioten. Hasieran, opari huts gisa hartu genuen, baina azkenean gure etxea kontzertu areto bihurtu da. Kaskoetan hainbat musika talderen abestiak sartu dizkiogu: Bulego, Go!azen, Shakira, Lola Indigo, Zetak, Pirritx eta Porrotx… eta gehiago. Musikarekin, gure alabak bere mundua sortzen du eta abestu egiten du. Batzuetan, oso ozen kantatzen du, etxean bakarrik egongo balitz bezala, beraz, bolumena murrizteko eskatzen diogu, gainerakoak ez molestatzeko.

Behin baino gehiagotan ere arropa aldatzen du: galtza motzak, kamiseta eta txupa jantzi, eta kitto, pop izar bihurtuta. Kontzertua hastera doa! Duela egun batzuk, Shakiraren Te Felicito abestia abesten ari zen. Momentu batean, abestiak esaten duena da: “Te felicito, qué bien actúas. De eso no me cabe duda…” Gure alabak ordea bere bertsioa sortu zuen: “Te felicito, qué bien actúas. A mí no me cabe dura…” Imajinatu gure barre algarak bere bertsioa entzun genuenean.

Haur txiki batek sortzen duen bat-batekotasunak eta ironiak ez dute preziorik. Kasko batzuk opari xumea izan daitezke, baina gure alabarentzat magia bihurtu da. Bere ametsak, bere abestiak eta bere irribarreak gure egunerokoaren oasi bihurtu dira. Gure alaba abeslaria da, eta guk auditorio aparta eskaintzen diogu: gure bihotzak eta gure etxea. Eta horrela jarraituko dugu, kantatzen duen bitartean, barre eginez eta musikaren magiaz disfrutatzen.