Urte hasieran, askok helburu berriak jartzen dizkiote bere buruari: erretzeari uztea, pisua galtzea, kirol gehiago egitea... Zerrenda horiek ia automatiko bihurtu dira jada urtarrilean. Nik, ordea, aurten beste erronka bat jarri diot neure buruari: hilero liburu bat irakurtzea.
Hamabi liburu urte osoan gozatzeko, presarik gabe. Denbora luzez, irakurketa alde batera utzita izan dut. Bizitzaren erritmoak, egunerokoak, ama izatea… Niretzat irakurtzea luxu txiki bat bihurtu zen. Eta hala ere, lehen orriak irekitzean, berehala gogoratu dut zergatik zen hain garrantzitsua niretzat. Irakurtzea deskonektatzea da. Beste leku batera bidaiatzea, burua isilaraztea eta norberaren denbora berreskuratzea.
Urteko lehen liburua aukeratzean, 2025ean ezagutzeko plazera izan nuen idazle baten lana hartu dut, jakinaren gainean. Horrela iritsi naiz Haizea Lopezen 'El Sacrificio de Basandere' liburura. Konturatu gabe, istorioak erabat harrapatu nau, eta lau egunetan irakurri dut, etenik gabe. Hori ez zitzaidan aspalditik gertatzen. Asko gustatu zait liburuaren erritmoa, giroa eta kontakizunaren indarra. Egilearen sentsibilitatea eta hurbiltasuna orri bakoitzean antzematen da.
Urteko lehen helburua bete dut jada, eta irakurtzeko gogoa are gehiago handitu zait. Orain, beste liburu bat daukat zain: 'Apocalipsis en Bilbao', Víctor Manuel Geterena. Kasualitatez, Bizkaiko bi egile jarraian. Ez dakit bide horri eutsiko diodan, baina badakit irakurketak berriz ere leku bat hartu duela nire bizitzan. Pozik nago.