Azkuna Zentroaren erakusketarik bisitatuena bihurtu da dagoeneko Chiharu Shiota artista japoniarraren My House is your House. Maiatzaren 27an inauguratu zenetik 56.000 bisita izan ditu, eta irailaren 28ra arte ikusi ahal izango da.

Erakusketarekin batera egiten diren jardueren programazioak irailaren 28ra arte jarraituko du. Erakusketaren komisarioa den Tereza de Arrudaren bisita gidatuak nabarmentzen dira, irailaren 25ean (12:00 eta 18:30) eta 26an (12:00). Sarrera doan izango da lekua bete arte, eta interesa duten pertsonek Zentroaren webgunearen bidez eman beharko dute izena. Gainera, Azkuna Zentroak ohikoak diren hogeita hamar minutuko sarrera-ibilbideak eskeintzen jarraitzen du, asteazken eta ostegunero egiten direnak.

Horrez gain, familiak ibilbide ireki bat ere egin dezake paperezko gida baten bidez, erakusketako pieza bakoitzaren inguruko jarduerak eta jolasak biltzen dituen paperezko gida baten bidez, familia-elkarrizketa sortzeko eta horri buruzko begirada eta gogoeta bitxia sustatzeko.

Chiharu Shiotaren lehen erakusketa monografikoa Euskadin

My House is Your House artistaren lehen erakusketa monografikoa da Euskadin. Artilezko hariekin egindako instalazio monumentalengatik da ezaguna, eta bere egiturek mundu poetiko eta onirikoan murgiltzera gonbidatzen dute. Chiharu Shiotak eguneroko bizitzako elementuetatik abiatuta ulertzen du bere obra, hala nola, oroitzapenak eta aurkitutako edo erabiltzen ez diren objektuak..

Tereza de Arruda artearen historialariak komisariatutako erakusketan kolore gorriak eta eskala monumentalak Azkuna Zentroko Kulturen Ataria eta Erakusketa Aretoa lotzen dituzte, hasieratik inoiz erakutsi ez diren azken instalazioetaraino. Erakusketa honetarako Chiharu Shiotak etxea kontzeptua landu du, etxeko esparrua espazio publikora zabalduz, Bilboko Alondegiaren arkitekturarekin elkarrizketan. Emaitzak, site-specific gisa, bisitaria bere oroitzapenekin konektatzen duten etxeko giro desberdinak esperimentatzera gonbidatzen du publikoa, eguneroko bizitzako elementuetatik abiatuta.

Atarian, lore-begi erako gorputza oroitarazten dute soineko gorri monumentalek, nia ezkutatzen hainbat agertzen duten babes-azal. Japoniako kulturan gorria bizitzaren, energiaren eta eguzkiaren sinboloa izanik, hemen gogora dakartza odol-lerroa, bizi-indarra eta izakien arteko elkarlotzea. Jantziek bigarren azal bati egiten diote erreferentzia: munduari aurkezten diogunari, bereizketarik eta pribilegiorik gabe. Azal hori da gure babesa, gure ezkutalekua, eta, era berean, alderdi pertsonalak adierazteko dugun baliabidea. Batez ere, gure etxearen beraren metafora da: gure espaziorik intimo eta pertsonalena, babesa eta konfiantza irudikatzen dituena.

Erakusketa Aretoko gunean, Shiotak azken hiru hamarkadetan ondu dituen lanen panoramikarekin batera, haren instalazioek hari-patroi korapilatsuak ehundu dituzte, loturak eratuz nola ehungintza tradizionalarekin, hala ekialdeko kaligrafiarekin. Hasiera eta amaiera argirik gabeko marrazki konplexu hedatua eratzen dute hariek, bideen, istorioen eta esperientzien sinbolo bilakatuta. Esekitako objektuek, hala nola jantziek eta leihoek, ez dauden presentziak irudikatzen dituzte, gogora ekarriz bizitzaren hauskortasuna eta memoriaren boterea.

Chiharu Shiota

Chiharu Shiota (Osaka, Japonia, 1972) pinturan (Kiotoko Seika Unibertsitatea, 1992-1996) eta arte bisualetan (Braunschweigeko Goi Mailako Arte Eskola, 1997-1999 / Berlingo Arte Akademia, 1999-2003) trebatuta dago, eta Berlinen bizi da.

Erakusketa hauek egin ditu, besteak beste: Nakanoshima Museum of Art, Osaka; Hammer Museum, Los Angeles; Queensland Art Gallery of Modern Art (QAGoMA), Brisbane; ZKM | Zentrum für Kunst und Medien, Karlsruhe; Zeelanda Berriko Te Papa Tongarewa Museoa, Wellington; Mori Arte Museoa, Tokio; Gropius Bau, Berlin; Australiako Hegoaldeko Arte Galeria; Yorkshire Sculpture Park, Erresuma Batua; Kochiko Arte Museoa; eta Osakako Arte Museo Nazionala. 2025eko lehen hiruhilekoan, Parisko Grand Palais-en erakutsi ditu bere artelanak.

Nazioarteko erakusketa askotan ere parte hartu du, hala nola Oku-Notoko Nazioarteko Arte Jaialdian, Sydneyko Biurtekoan, Echigo-Tsumariko Arte Hirurtekoan eta Yokohamako Hirurtekoan eta São Pauloko SESC Pinheiros-en. 2015ean, Shiota hautatu zuten Japonia ordezkatzeko Veneziako Bienalaren 56. edizioan.

Tereza Arruda

Tereza de Arruda (São Paulo, Brasil, 1965)  arte-historialaria eta komisarioa da. São Paulo (Brasil) eta Berlin (Alemania) artean bizi da, eta komisario-lanak egin ditu Europan, Hego Amerikan, Estatu Batuetan eta Asian, besteak beste, Ilya eta Emilia Kabakov, Chiharu Shiota, Sigmar Polke, Yang Shaobin eta Wang Chengyun artisten erakusketa monografikoetan eta nazioarteko erakusketa kolektiboetan, testuinguru soziokultural garrantzitsuetan.