Munduan gizaki gisa dugun existentzia baldintzatzen duten helburu edo mugei buruz, eta horiek gainditzeko dugun gaitasunari eta nahiari buruzko gogoeta proposatzen du Pablo Viar antzerki zuzendariak Azkuna Zentroan estreinatuko duen 'Confines' izeneko lanak.

Azkuna Zentroa-Alhóndiga Bilbaok eta Muxikebarrik koproduzitua eta EszenAZ, Azkuna Zentroko Arte Bizien Denboraldian kokatua, ‘Confines’ identitateari, aurrerapen zientifikoari eta errealitatearen eta fikzioaren arteko muga iragazkorrei buruzko ikerketa eszeniko baten emaitza da, samurtasunaren eta komikotasunaren artean dabilena, eta ikuslearen konplizitatea eskatzen du.

Pablo Viarren zuzendaritzapean eta Eguzki Zubia eta Txubio Fernández Jáureguiren interpretazioarekin, antzerki-lan berri hau ikerketa eszeniko partekatu baten emaitza da. Ispilu-joko bat da, samurtasunaren eta komikotasunaren artean dabilena eta, aldi berean, ikuslearen konplizitatea eskatzen du.

Pertsonaiak espazio berean elkarrekin bizitzeak nahasmenduak, ezusteak eta errebelazioak eragiten ditu, eta artearen eta egunerokotasunaren, zientziaren eta espiritualitatearen, fikzioaren eta errealitatearen arteko mugei buruz eta horiek gainditzeko dugun gaitasunari eta nahiari buruz hausnartzera gonbidatzen gaituzte.

Pablo Viar

Pablo Viar antzerki, opera eta zarzuela-zuzendaria da, Musika eta Arte Eszenikoetan diplomatua London Academy of Music and Dramatic Art-en, eta Historian lizentziaduna Deustuko Unibertsitatean.

Bere azken lanen artean, honako hauek nabarmentzen dira: La vida es sueño, Almagroko Jaialdia 2021; Enigma Pessoa, Madrilgo Abadiako Antzokia, orain berrian Londresen eta nazioarteko hainbat jaialditan antzeztua; Pucciniren Madama Butterfly, Jerezeko Villamarta Antzokia; W. Shakespeareren El sueño de una noche de verano / Uda gau bateko ametsa, Bilboko Arriaga Antzokia, 2016ko Euskal Ekoizpen Onenaren Ercilla Saria.

Gainera, Guridiren El caserío eta Iphigenia en Tracia zarzuelak zuzendu ditu Madrilgo Zarzuela Antzokian. Horrez gain, musika-ikuskizunak diseinatu ditu Madrilgo Errege Antzokian, Bilboko Arriaga Antzokian, Etxea Kepa Junkerarekin, Juan March Fundazioan eta Getxoko Muxikebarri Arte Eszenikoen Zentro berriaren irekierajardunaldian (Bizkaia).