Arratsaldeko 19:00etan

Bernardo Atxagak bere liburu berria aurkeztuko du gaur Bidebarrietan

04.06.2020 | 04:00

BILBO. Gaur, hilak 4, arratsaldeko 19:00etan, Bernardo Atxagak bere liburu berria, 'Etxeak eta hilobiak' izenekoa, aurkeztuko du Bidebarrieta Kulturgunean. Hori bai, koronabirusak eragindako egoera dela eta, online izango da aurkezpena. Eleberria Pamiela Etxea argitaletxeak argitaratutakoa da.

Iñaki Esteban kazetari eta idazleak dinamizatuko du hitzaldia. Azken liburu hori abiapuntu hartuta, aipatutako erabaki hori hartzeko arrazoiei buruz hitz egingo dute, bizitzari eta literaturari buruz eta horien arteko harreman korapilatsuei buruz, bai eta gauzak beste ikuspegi batetik aldarazten edo begiratzen dizkiguten krisi-uneei buruz ere.

Zoom plataformaren bidez egingo den hitzaldi hau jarraitzeko, Bidebarrieta Kulturguneak gonbita bidaliko die posta elektroniko bidez Bilboko Udalak bultzatutako kultur jardueren berri emateko harpidetutako pertsonei. Harpidetuta ez egonez gero, esteka honetan egin daiteke. Gainera, streaming bidez ikusi ahal izango da kulturguneatb.eus webgunean, YouTube bidez. Amaitutakoan, Bidebarrieta Kulturgunearen Facebook-eko profilean partekatuko da.

Bernardo Atxagari buruz hitz egitea euskal literaturaren adierazle handienetako bati buruz hitz egitea da. Autorea, euskarazko literatura berritu duena, euskarazko idazlerik irakurriena eta itzuliena da, eta ipuina, eleberria, poesia eta saiakera biltzen dituen bibliografia zabala du. Bere lehen eleberriarekin, 'Bi anai', Kritikaren Saria eman zioten 1985ean eta 'Obabakoak' lanagatik, Euskadiko historia tragikoaren biktima, Obabako mundu idilikoaren amaiera kontatzen duen eleberria, Kritikaren Saria, Euskadi eta Literatura Sari Nazionala jaso zituen 1989an. Azken liburu hori da, zalantzarik gabe, nazioartean arrakasta handiena izan duen euskarazko liburua, 26 hizkuntzatan itzulia eta Montxo Armendarizek 2005ean zinemara eramana.

Bernardo Atxaga Euskaltzaindiko kidea da 2006az geroztik, eta ukaezina da euskal kulturaren esparru osoan duen eragina; izan ere, bere poema asko euskal talde eta kantautoreek musikalizatu dituzte. Joan den 2019an, Espainiako Letren Sari Nazionala eman zioten bere obra osoagatik.

Iñaki Estebanek Bernardo Atxagari lagunduko dio hitzordu honetan. Esteban kazetaria da El Correon, eta hainbat irratsaio eta argitalpen kulturaletan parte hartzen du. 'Libertad y sentido en las sociedades democráticas' lanaren egilea da, eta 2003an Miguel de Unamuno saria lortu zuen. 'Bilbao de cine'-ren egilekidea ere bada eta 'Diccionario de la existencia'-n parte hartu du nazioarteko filosofo garrantzitsuekin batera. 2002an, Kataluniako Editoreen Gremioak Atlantida Saria eman zion urteko artikulugile onenarentzat.