BILBO. Bilbao 700 Fundazioak antolatzen duen 365 Jazz Bilbao zikloaren aretoetako zortzigarren denboraldia hasiko da astearte honetan, urriaren 6an, Bilboko Elkarte Filarmonikoaren egoitzan, 20:00etan, jazzaren munduan urte mordoa daraman laukote batekin: The Abercrombie Quartet.
Antolatzaileek jakinarazi dutenez, New Yorkeko semea den John Abercrombie da taldeko liderra. Bere hitzetan, "jazzaren alorreko gitarrarekin zuzeneko lotura duen norbait bezala ikus nazatela nahiko nuke, muga musikal zenbait gehituta".
40 urtetik gorako ibiliarekin eta ia 50 diskorekin, Abercrombie ohikoak ez diren soinuak dituen jazzaren maisua da gitarra jotzen. Ikertzaile nekagaitza, jazzaren tradizioan dihardu lanean, eta gainera, hainbat emanaldi eskaini eta bira egiten ditu. ECM etxearekin jarraitzen du grabatzen, azken 30 urteetako harremanarekin jarraituz.
Modu honetan, "jazzik onena Bilbora itzuliko da Bilbao 700 Fundazioaren eskutik eta kontzertu paregabeak izango dira urte osoan". Atzerriko artista ospetsuek eta estatuan finkatuta dauden taldeek hiriko aretoak eta hotelak beteko dituzte "dagoeneko fidela den ikus-entzuleak asetzeko".
