Kalitate handiko produktu ekologikoak eta giro ederra, Mungiako Nekazaritza Azokan

Ehunka lagunek bisitatu zituzten atzo Mungiako Nekazaritza Ekologikoaren Azokako 15 postuak, kalitate handiko eta askotariko produktuez beteta

26.09.2021 | 01:14
Giro ederra egon zen goizean zehar.

Ekoizle onak, bezeroak primeran artatu zituzten baserritarrak, eta giro ona. Hauek izan ziren osagai nagusiak atzo Mungian, Nekazaritza Ekologikoaren Azokan. Covid-19 zela eta, aurreko urtean ezin izan zen egin, baina, atzo, Mungiak azoka horren beste edizio bat hartu zuen, urtez urte hain harrera ona izaten duena. Eta oraingoan ez zen gutxiagorako izan; izan ere, jendea animatu zen azoka bisitatzera eta baserritarrek bertara eraman zituzten produktu aberats eta askotarikoak erostera, Mungiako ingurutik eta urrutiagotik ere iritsi zirenak. Baina denek zuten zerbait komunean, edo, hobeto esanda, beren postuek bazuten zerbait komunean; produktuen kalitatea eta horiek egiteko erabiltzen duten mimoa. Mungiako Nekazaritza Ekologikoaren Azokan gertuko produktuak erosteko aukera ezin hobea egon zen. Goizean zehar, Foruen enparantzak ekimen honen XXI. edizioa jaso zuen. Eskualdeko eta inguruko barazki, fruta, okela, esneki, ogi eta bestelakoak eskaini zituzten bertaratu zirenei.

Gainera, produktu ekologikoz betetako hiru otzararen zozketa egin zen, 15 saltokietan erosi zutenen artean. Hori izan zen azokan jarri ziren postuen kopurua, hamabost guztira. Bertan, Mungialdeko, Bizkai osoko eta Araba, Nafarroa eta Zamorako ekoizleek salgai jarri zituzten euren kalitate handiko produktu naturalak, Udalak Foruen enparantzan instalatutako saltokietan. Barazkiak, esnekiak, txakolina, okela, mermeladak, eztia... Denetariko elikagaiak erosteko aukera izan zuten hurbildutakoek. Mungiaren ordezkari moduan, batetik, Gorka Irazabal (Goreko) egon zen, bere barazki bikainekin; eta, bestetik, Itturbaltza Artisau Elikagaiak, bertako txahalen okela eskaintzen.

Irazabal, gainera, Ekolur azokako presidentea da, eta azokaren bultzatzaileetako bat: "Mungiakoa benetako azoka da, jendea erosketak egitera eta produktua ezagutzera etortzen da, eta giro oso ona dago". Gainera, "Mungian, nire etxean, azoka hau berriz izateko gogo handia nuen, tradizio handia du eta edizio asko daramatzagu". Bere postuan barazkiak eta sasoiko frutak zituen, itxura ederrarekin. Lurmenako Ohiane eta Mikelen kasuan, euren ibilbidea oso bestelakoa da, "etorri garen bigarren aldia" izan baitzen atzokoa. Beren kasuan, batez ere zuzeneko salmentaren alde egiten dute, baina azoka ba-tzuetara joaten dira, batez ere "Fruizetik hurbilen geratzen zaizkigunetara", bertan baitituzte barazki eta produktu ekologikoak.

Atzo ere izan zen Euskal Herritik kanpo etorri zenik; Rocío Gangosok eta Javier Alvarezek Zamoratik ekarri zituzten produktuak. Lehen Zallan bizi ziren, Javierren herrian, baina "Rocioren aitaren lurraz arduratzea eta produktuak ekoizten jarraitzea erabaki genuen", kontatu zuen Alvarezek. Ez da Euskadin azoketara joaten diren lehen aldia, izan ere, "asko mugitzen gara, batez ere Euskadin eta Asturiasen". Bere postuak baratxuriak, lekaleak, beste ekoizle batekin batera ekoizten duten olioa edo pistatxoak bezalako produktuak zituen, ahalegin handia egin ondoren eta lantzen hasi eta hamar urtera lortu dutena.

Kalitate handiko produktu ekologikoak eskuratzeko aukera izateaz gain, aurretik aipatutako saltokietan erosketak egin dituzten bisitarien artean produktu ekologikoz betetako hiru otzara zozketatu zituzten.

"Benetako azoka da, jendea erosketak egitera eta produktua ezagutzera etortzen da"

Gorka Irazabal

Goreko

"Asko mugitzen gara horrelako azoketan, batez ere Euskadin eta Asturiasen"

Javier Álvarez

Eco Prado


noticias de deia