Datozen egunotan

3R programak lana emateko jasotzen dituen ekintzak hasiko ditu Barakaldok

04.03.2021 | 11:45

BARAKALDO. Barakaldoko Udalak datozen egunotan abiaraziko ditu Bizkaiko Foru Aldundiaren Enplegua, Gizarte inklusioa eta Berdintasuna Sustatzeko Sailak finantzatutako 3R programak lana emateko jasotzen dituen ekintzak. Enplegu Arloko zinegotzi ordezkari Juan Antonio Pizarrok neurri honen nondik norakoak azaldu egin ditu prentsaurreko batean.

"Covid-19k eragindako krisiaren ondorioz lanik gabe geratu diren ehun bat pertsonari zuzendua dago programa. Auzokide horiek birkokatzea lortzeko lan egingo dugu, enpresekin topaketak eginez eta enplegu-eskaintzak lortuz; hau da, enpresekin bitartekotza eginez", azaldu du Pizarrok.

Interesa dutenek Inguraldera jo dezakete, ekimenean izena emateko. Edo bestela, telefonoz 944 789 408 eta 944 789 176 zenbakietara deituta edo bi helbideotako batera posta elektronikoa bidalita ere: alpes.empleo@inguralde.eus eta alpes.laguntza@inguralde.eus.

Bi orduko 10 modulutan lan egingo da birkokatze prozesuan. Era berean, 10 kidek osatuko dute modulu bakoitza, eta horiekin banaka zein taldeka egingo da lana, kasu batzuetan aurrez aurre eta beste batzuetan, berriz, telematikoki. Integrando Fundazioa arduratuko da lan hori guztia egiteaz.

Honako sektoreotako enpresekin topaketak egitea aurreikusi da: eraikuntza, bulegoen digitalizazioa, bezeroarentzako arreta-zerbitzuak (telemarketina), logistika, biltegia eta garraioa, zerbitzu soziosanitarioak, garbiketa-zerbitzuak eta hondakinen bilketa, fabrikazio mekanikoa, energia berriztagarriak eta elikadura-zerbitzuak (supermerkatuak).

Juan Antonio Pizarrok azaldu duenez, "Enpresekiko bitartekotza-lan hori oso onuragarria da langabezian dauden langileentzat ez ezik, konpainientzat berentzat ere, lanpostu bakoitzerako bilatzen duten profila errazago aurki baitezakete".

noticias de deia