GETXO. Hurrengo astean hasiko ditu Getxok edukiontzi hori eta urdinetan aho-sistema instalatzeko lanak. Sistema horri esker, erabiltzaileek ez dituzte estalkiak eskuarekin ikutu beharko. Aurreikusita dago lanak uda aldera bukatzea, eta ondoren "in situ" egingo diren muntatze lanak beste bi hilabete iraungo dute.
112.119€-ko kostua izango duen lehenengo jarduketa hori, alde batetik, 2019rako Partaidetza-Aurrekontuen barruan kokatzen da; aurrekontu horietan, herritarrek lehenetsitako aukera edukiontziak aldatzeari buruzkoa izan zen, horiek irisgarriago egiteko; eta, bestetik, udal gobernuak EH-Bildurekin 2018ko azaroan sinatu zuen Hiri Hondakinei (HH) buruzko akordioan, 2022an gaikako bilketan eta bereizketan birziklapenaren%50era iristeko erronkan aurrera egitea ahalbidetuko duten ekintzak inplementatzeko, Europako zuzentarauei jarraituz.
Ildo horretan, adierazi behar da 2019an hondakinen birziklatze-tasa% 34,50koa izan zela, eta aurreko urtean% 31,31koa; Getxo aipatutako erronka horretatik gero eta gertuago jarriz.
13 PUNTUKO IGOERA
Edukiontzi berriak Getxon ezartzearen ondorioz, ehuneko 13 puntu igo da HH-Hiri Hondakinen gaikako bilketa udalerrian. Horrek esan nahi du edukiontzi zaharrak gaur egungoekin ordeztu zirenetik eta 2019ko amaierara arte, urtero 3.000 tona hondakin gehiago biltzen direla gaika, urtean 10.000 tonara iritsi arte (horiei gehitu beharko zaizkio "errefusa" zatiari dagozkion 19.000 tonak, edukiontzi grisari dagozkionak, alegia). Hedapenaren ondorioz, gaikako 951 edukiontzi gehiago jarri ziren, eta, gaur egun, 1.613 edukiontzi daude guztira; "errefusa" frakzioko 574 edukiontzi grisak gehituta 2.187 edukiontzi daude guztira.
2019an, biztanle eta urte bakoitzeko honako kilo hauek sortu ziren Getxon: 44,35 kg paper, 21,54 kg ontzi, 25,03 kg beira eta 249,91 kg gainerakoa. Bizkaiko iazko datuen berri izan ez arren, 2018an Getxoko zifrak lurraldeko batez bestekoaren gainetik jarri ziren,% 37 gehiago paperean, %31 gehiago ontzietan, %4 beiran eta %10 gutxiago gainerakoen frakzioan. Udalak herritar gehienek birziklatzearekin duten inplikazioari egotzi dio igoera hori, eta eskerrak eman dizkie egindako lanagatik, eta materia organikoa biltzeko zerbitzuan (edukiontzi marroia) alta ematera animatu du, 94 464 43 80 telefono-zenbakiaren bidez edo www.getxo.info-citi.es helbidean online, funtsezko frakzioa baita 2022rako erronka hori lortzeko.
