Basurtu/Altamira auzoan kokatuta dagoen Bilbao Hostel aterpetxean proiektu pilotu berri bat jarri du martxan: Bilbao Hostel Coliving. Ekimen honen bidez, gazte ekintzaileei eta profesionalei ostatua emango zaie, ostatua eta lanerako zein aisialdirako espazio komunak uztartzen dituen espazio batean.
EDE Fundazioaren mendeko Suspertu gizarteratze-enpresak kudeatzen du Bilbao Hostel instalazioa, eta Bilboko Udalaren laguntzarekin egiten du. Euskadin lehenengoz garatuko den proiektu pilotuaren bitartez, beste espazio bat bideratu nahi dute hiribildua unibertsitate-hiri izatearen aldeko apustuari aurre egiteko, non berrikuntza eta ekintzailetza bultzatu eta nazioarteko talentua erakarri nahi diren.
Honako hauek bildu dira ekimena aurkezteko ekitaldian: Juan Mari Aburto, Bilboko alkatea, Xabier Ochandiano, Garapen Ekonomiko, Merkataritza eta Enplegu Saileko zinegotzia eta zentroko arduradunak, José Puyo, EDE Fundazioko zuzendaria, eta Toñi Bueno, Bilbao Hostel-eko kidea.
PROIEKTU PILOTUA
Enpresaren proiektu pilotuaren xedea da unibertsitate-prestakuntza amaitzen edo egiten ari diren (masterrak, doktoretzak...) eta zientzia, teknologia edo arteen esparruan talentua duten gazteei eta aipatutako alorretan Bilbon aldi baterako proiektu profesionalak edo ikerketa-proiektuak garatzen dituzten pertsonei behin-behinean ostatu ematea. Pertsona horiek nahi dutelako parte hartu ahal izango dute proiektuan edo tokiko beste enpresa, ikerketa-zentro eta unibertsitate-zentro batzuetatik etorrita.
Bilbao Hostel proiektuaren coliving ereduaren aldeko apustuak formatu hibrido bat izango du; hau da, coworking eta coliving espazioak turismo-ostatu batekin uztartuko dira, bertan ostatu hartzen duten bi motatako pertsonen arteko bizikidetza zabaltzeko. Hori horrela, ingurumenarekiko konpromisoari eutsiko zaio espazioan, eta jardun jasangarriak indartuko dira. Apurka-apurka zerbitzuak digitalizatuko dira garai berrietara egokitzeko, eta auzoarekiko espiritu konprometitu eta irekia mantenduko da osatzen duten saltoki eta entitateekin batera lan egiten. Bestalde, enplegu inklusiboa sortzen jarraituko du laneratzeko Suspertu enpresaren bitartez, lan-merkatura sartzeko aldi baterako zailtasunak dituzten pertsonak kontratatuz.
Proba pilotuak, gehienez ere, bi urte iraungo du, eta horien ostean proiektuaren jarraitutasuna eta garapena aztertuko dira. Azterketa horren bitartez, honako ezaugarri hauek egiaztatuko dira: tipologia horretako ostatu-formatu bat beharrezkoa den, udal-instalazioak coliving eredura bideratutako leku izatearen egokitasuna eta programaren bideragarritasun ekonomikoa, enplegu inklusiboko proiektuaren ezaugarriei eutsiz.
ESPAZIOAK ETA ZERBITZUAK
Proiektu pilotua turismo-aterpetxe batean dago, Kastrexana eraikinean, eraikin nagusiari lotua, non askotariko gizarte-zerbitzu eta entitateak biltzen diren, bai eta prestakuntzarako, berrikuntzarako eta ekintzailetzarako espazioak ere. Espazioak egokitu ondoren, lehenengo fasean, proiektu pilotuak solairu bat (8 logela eta 12 oherekin) eta lan- zein jarduera-eremuak, eremu komunitarioak, espazio esklusiboak eta kanpoko espazioak izango ditu. Guztira, coliving eredura bideratutako 1.400 metro karratu egongo dira.
Coliving ereduaren erabiltzaileek, lo egiteko espazio bat, eremu komunak eta lanerako lekuak edukitzeaz gain, honako zerbitzu hauek edukiko dituzte eskura: logelak garbitzeko zerbitzuak, garbitegi-zerbitzua, Internet konexioa, jantokia eta taberna-kafetegi zerbitzua, besteak beste.
Bilbao Hostel Coliving proiektuaren beste berritasun garrantzitsu bat “Bideratzaile” figura izango da. Bertan ostatu hartuko duten pertsona guztien integrazio eta bizikidetza ona bermatuko dute eta lan egiteko eta bizitzeko beharrezkoa den guztia edukitzea ere bai. Hauexek izango dira figura horren zereginak, besteak beste: egonaldiaren jarraipen pertsonalizatua, erabiltzaileen arteko komunitate-sentimendua bultatzea, programatzen diren jarduera guztietan parte hartzera gonbidatuz, eta erabiltzaileak auzoko merkataritza-bizitzan txertatzea, eremuko saltokiekin harremanetarako sare bat garatuz.
