Udal musika eta txistulari bandek elkarrekin joko dute berriro Areatzako kioskoan

Duela bi aste eskainitako lehen kontzertu bateratuak izandako harrera bikainaren ondoren, Bilboko Udal Musika Bandak eta Udal Txistulari Bandak elkarrekin joko dute bihar, ostirala, Areatzako kioskoan, 19:00etatik aurrera.

2021eko Udaberriko denboraldiko laugarren kontzertua izango da, eta maiatzeko eta ekaineko kontzertu-zikloen barruan bi taldeek programatuta dituzten hiru kontzertuetatik bigarrena.

Oraingoan, J. Rafael Pascual-Vilaplana Musika Bandaren zuzendari titularrak eta Garikoitz Mendizabal Txistulari Bandaren zuzendariak zuzenduko dute "Irekitzeko musikak" izeneko kontzertua.

Hitzordu berri honetarako, txistulari boskoteak Eduardo Moreno, Eduardo Gorosarri eta Jose Inazio Ansorena musikagileen hiru suite joko ditu. Musika Bandari dagokionez, Jacques Offenbachen Les Bavards obrari buruz Francisco Solerrek egindako transkripzioarekin batera, Martin Ellerby konpositore ingelesak eta J. Enric Canet Todolí eta Carlos Pellicer konpositore valentziarrek bandarako idatzitako jatorrizko hiru obertura entzungo dira.

Maiatzeko kontzertuetan bezala, ikuskizunak protokolo berezi bat izango du, artisten, ikusleen eta teknikarien segurtasuna ahalik eta gehien bermatzeko, indarrean dauden osasun-neurri guztiak betetzen direla ziurtatzeko. Kioskoa eta haren ingurua mugatuta egongo dira, maskara nahitaez erabili beharko da, aulkiak ezarritako segurtasun-distantzian kokatuko dira eta ezingo dira tokiz mugitu. Era berean, jendearentzako osasun-jarraibideak jasotzen dituen kartel bat jarriko da, eta aulkiak, instalazioak eta gainerako elementuak jarduera hasi aurretik desinfektatuko dira.

Biharko kontzertuaren ostean, bi bandak berehala taularatuko dira. Musika Banda Areatzako kioskoan agertuko da berriro, datorren ostiralean, ekainaren 11n. Oraingoan, Iñaki Urkizu izango da zuzendaritza lanetan arituko dena, erritmo hirutarra oinarri duten partitura ezberdinak entzungo ditugun "Hirutarreko erritmoak: jotatik balsera" kontzertua gidatzeko. Horien artean, Agustin Lararen Granada, Tomas Bretonen Gran Jota de La Dolores edo Léo Delibesen Coppélia bezalako konposizio ezagunak, Emilio Cebrián, Moritz Moszkowski eta Aram Katchaturianen beste partitura batzuez gain.

Udal Txistulari Bandak, berriz, ekingo dio bere jarduerari, ekainaren 16an, 19:00etan, Euskal Museoan eskaintzen dituen formazio tradizionaleko kontzertuei jarraipena emanez. Gainera, boskoteak bere doinuak hiriko hainbat auzotara eramaten jarraituko du "Txistu Banda auzoetan" kontzertu programari esker. Ekainaren 11n Plaza Berria bisitatuko dute eta ekainaren 18an Gasaren Plazaren ingurua girotuko dute. Bi hitzorduak 12:00etan hasiko dira eta ordubete inguruko iraupena izango dute.