Bilbo Ekinean Gala

Bilbok pandemia garaiko ekintzaileak saritu ditu

22.03.2021 | 18:07
Bilboko alkate Juan Mari Aburto, sarituekin hitz egiten.

BILBO. 2020a urte benetan zaila izan da gizartearentzat, baita ekintzaileentzat ere. Hori dela eta, Bilboko Udalak pertsona ekintzaileak saritu nahi izan ditu urtero ospatzen den Bilbo Ekinean Galan. Aurten, koronabirusaren pandemiak eragindako egoera sanitarioa dela eta, ezin izan da gala ospatu, baina hala ere Udalak sariak eman nahi izan ditu.

Udalean garrantzi handia ematen diote ekitaldiari, urtero-urtero, hirian enpresa bat martxan jarri duten ekintzaile guztiak saritzen eta aintzatesten baitira bertan. Ekintzaile guztiek jasotzen dute Bilboko Baldosa Juan Mari Aburto alkatearen eskutik. Figura sinboliko bat da, baina oso maitatua, udalaren laguntzarekin negozioa abian jartzeko egindako bidea islatzen baitu.

Hala eta guztiz ere, 2020. urteko, covid-19aren urteko, ekintzaileei dagokienez, Bilboko Udalak ez du aipatu gabe utzi nahi izan 112 enpresa berri sortu izanaren garrantzia, aldi horretan izandako murrizketak eta zailtasunak kontuan hartuta. Hauxe esan du alkateak: «Kopuru oso garrantzitsua da, eta orain, inoiz baino gehiago, nabarmendu egin behar dugu, inoiz bizi izan dugun urterik latzena izan baita. Pertsona ausarten urtea izan da, pandemia-garaian negozioak sortzen ausartu baitira».

Enpresa berri horiek martxan jartzeko, udalak eskainitako babesa eta aholkularitza jaso dituzte Bilbao Ekintza udal-sozietateari atxikitako Big Bilbao (Bilbao Ideien Gunea) ekintzailetza-zentroaren bitartez. Lantaldearen laguntza jaso dute une oro, modu semi-presentzialean edo birtualean ekintzaileen familia handiari zerbitzua ematen jarraitu baitu.

Juan Mari Aburtok azaldu duen bezala, 112 sozietateek, halaber, 137 lanpostu berri sortu dituzte hirian, eta, guztira, milioi bat euro baino gehiagoko inbertsioa egin da.

BILBOKO BALDOSA, AHALEGINAREN OMENEZ

Ekintzaile guztiei hurbileko omenaldia egin zaie udaletxeko Areto Arabiarretik, «hiriko gertakari garrantzitsuen aretotik», non mugikor erraldoi baten formatua duen pantaila batean sustatzaileen argazkiak ikusi diren, Bilboko Baldosa eskuan. Horrela, protagonismoa eman zaie 2020. urteko ausartei, Juan Mari Aburtok deskribatu dituen bezala.

Baldosa hori alkateak eta Xabier Ochandiano zinegotziak zuzenean eman zieten duela egun batzuk. «Bilboren oroigarri bat edukitzea nahi genuen, egindako ahaleginaren sinboloa, eta nola edo hala hemen ordezkatuta egon zitezen nahi genuen, udalaren bihotzean, hau da, hiriaren bihotzean».

Irudiez gain, enpresa hauetako bi sortzaile ere izan dira bertan: Tokitu Espacios, Amaia Díez Rodriguez eta Jokin Astorquiarena, espazioak teknologia berriak erabiliz diseinatzeari lotua, eta Ceolex Geisiane Maiara Marth-ena, aholkularitza juridikoko on line zerbitzuak eskaintzen dituen firma. Bi enpresen sustatzaileek covid-19aren urte honetan bizitako esperientzia eta bizipenak partekatu dituzte, 2020. urteko ekintzaile guztien ordezkaritzan.

EKINTZAILETZAREKIKO INTERESA DUTEN GAZTE GEHIAGO

Enpresen kopuru altuaz gain —2019. urtean 139 izan ziren—, 30 urtetik beherako gazteek zuzendutako ekimenek gora egin dutela azpimarratu behar dugu. Guztien % 28,47 izan dira, nahiz eta ekintzaile gehienak 36 eta 45 urte arteko adin-tartean egon.

Besteak beste, adierazi beharra dago pixkanaka-pixkanaka emakumeen kopuruak gora egin duela, eta, orain, negozio berrien % 51,09 hartzen dituzte. Bestalde, erdi-mailako eta goi-mailako ikasketak dituztenen kopuruak ere gora egin du (% 81,74).

Sektoreen arabera, hauexek dira jarduera nagusiak: enpresa-zerbitzuak (% 20,54), merkataritza (% 17,86), diseinua (% 17,86) eta gizarte-jarduerak eta zerbitzu pertsonalak (% 8,93). Amaitzeko, eta kokapena kontuan hartuta, negozioen % 29,46 Ibaiondoko barrutian ezarri ziren, % 26,79 Abandon, % 9,82 Begoñan eta % 8,93 Deustun eta Rekalden.

BIG BILBAO, IDEIEN FABRIKA

Bilboko Udalak, 2017. urtetik eta BIG Bilbao (Bilbao Ideien Gunea) ekintzailetza-zentroaren bitartez, negozio eta start-up berriak sortzeko eta finkatzeko beharrezkoa den laguntza eskaintzen du. Zentroan jardunean ari diren profesionalek 20 urte inguruko ibilbidea dute ekintzailetzaren esparruan, eta 2.000 enpresa baino gehiago sortzen lagundu dute. Zentroa Bilbao Ekintza udal-sozietateari dago atxikita.

BIG Bilbaon atsegin handiz hartzen ditugu negozio-ideia guztiak, baina, bereziki, udalak garapen ekonomikorako eta hiria proiektatzeko estrategikotzat jotzen dituenak, hau da, zerbitzu aurreratuak, kultura- eta sormen-industriak eta ekonomia digitala. Oinarri teknologikoko proiektuetarako eta start-upetarako berariaz diseinatutako ekintzailetza digitaleko programa nabarmendu behar da.

2020. URTEKO DATUAK

Iaz, 2020. urtean, udal-zerbitzuan 1.272 pertsonek jaso zituzten ekintzailetzarako laguntza eta aholkularitza. Guztira, 332 enpresa-ekimen jaso ziren, eta 421 proiektuk laguntza eta aholkularitza jaso zituzten (421 proiektu horietatik, 246 proiektu 2020. urteko ekimen berriak izan ziren).

Elkarrekin egindako lan horretatik, 112 enpresa berri sortu ziren, eta 137 lanpostu berri sortu zituzten Bilbon. Hain zuzen ere, horiexek dira Bilboko Udalak omendu dituenak.

Era berean, Bilbao Ekintzaren babesarekin martxan jarritako enpresen % 68k, gutxi gorabehera, martxan jarraitzen du lehenengo hiru urteak igaro ondoren.

BIG Bilbao zentroko zerbitzu guztiak doan eskaintzen zaizkio ekintzailetzaren komunitateari, eta Europako Gizarte Funtsa 2014-2020 programa eragilearen % 50eko finantzaketa jasotzen dute.

BIG BILBAO HANDITU EGIN DA 2020. URTEAN

Pandemiaren eragina gorabehera, 2020. urtean hazkunde- eta hedapen-urtea izan da ekintzailetzarako Big Bilbao uda-zentroarentzat.

Hori horrela, urrian Zabalguneko eraikinera aldatu zituzten bulegoak (Zabalguneko plazan), bertan covid-19ari lotutako neurri berrietara hobeto egokitzeko; izan ere, distantzia luzeagoak eta espazio handiagoak behar dira. Alabaina, batik bat, bulegoak eta zerbitzuak zabaldu nahi izan dituzte instalazio berrietan, hazten jarraitzeko proiekzio irmoarekin.

Bilbon negozio berri bat sortu nahi dutenek informazioa eska dezakete Big Bilbao zentroan, telefono bidez 944 20 53 60 zenbakian edo big@bilbaoekintza.bilbao.eus helbidera mezu elektroniko bat bidaliz.