BILBO. Bilbaoeszenak antzerki ikastaroetarako izena emateko epea zabaldu du. Tailerrak umeei, gazteei eta helduei zuzenduta daude. Interesa dutenek irailaren 16tik 29ra arte egin ahal izango dute aurre-inskripzioa, udal webgunean www.bilbao.eus.
BilbaoEszenak umeei (8 eta 11 urte bitartekoei) eta gazteei (12 eta 16 urte artekoei) zuzendutako antzerki ikastaroak antolatzen ditu urtero 2005etik. Urte horietan 450 ume eta gazte baino gehiagok hartu dute parte adin horietarako dagoen jarduera eskaintza urria zabaltzeko xedea duen ekimen horretan. Soilik euskaraz emango diren umeentzako eta gazteentzako tailerrak ostegun arratsalde guztietan izango dira, ekainera arte. Ikasturte honetan, prestakuntzaren arduradunak Miriam K. Martxante (umeentzako antzerkia) eta Alex Antúnez (gazteentzako antzerkia) izango dira.
Tailer horiek hiru helburu nagusi dituzte: antzerkia sustatzea eta ezagutaraztea Bilboko umeen eta gazteen artean; antzerkiarekin erlazionatutako jardueren aurrean interesa duten umeei eta gazteei prestakuntza eskaintzea; eta antzerkiko tekniketan ondo prestatuta egongo den zaletu sarea sortzea, horiek izan daitezkeelako etorkizuneko profesionalak. Matrikularen kostua 118,90 eurokoa izango da ikastaro osorako (86,45 euro langabezian dauden gurasoentzat edo Sarrera Berme Errentaren jasotzaileentzat).
PRESTAKUNTZA ESZENIKOA HELDUENTZAT
Helduei zuzendutako prestakuntzak umeentzako tailerren helburu berberak ditu. Oraingo honetan, Eszenarako Prestakuntzan eta Sorkuntzan zentratutako urteko ikastaroa (60 ordu) Nuria M. Cresek emango du gaztelaniaz eta Maria Urcelayk euskaraz. Jarduera astelehen (euskaraz) eta asteazken (gaztelaniaz) guztietan izango da, arratsaldeko 19:30etik 21:30era.
Ikastaroa antzerkiaren eta eszenaren munduan interesatuta dagoen edozein pertsonari dago zuzenduta, eta oinarrizko bi eremu landuko ditu: antzezle lana (energia, erritmoa, adierazpena, koordinazioa, emozioa?) eta sorkuntza lana (bat-batekotasuna, espazioaren definizioa, ideien bilaketa?). Ikastaroek 183,75 euroko kostua dute, 151,30 euro langabezian dauden pertsonentzat edo Sarrera Berme Errentaren jasotzaileentzat.
Ohikoa denez, eskariak eskainitako plaza kopurua gainditzen badu, aukeraketa egingo da aurre-inskribatutakoen artean, ondoren adierazten diren irizpideen arabera: lehentasuna izango dute Bilbon erroldatutakoek, eta gizonen eta emakumeen arteko parekotasuna eta euskarazko taldeak osatzeko aukera bilatuko da.
