- Etxebarriko Udalak 2021eko aurrekontuak onartu ditu. Aho batez egin zuen, gizarte-zerbitzuei lehentasuna ematen dien aurrekontuarekin, udal-zerbitzuei eta tokiko elkarteentzako laguntzei eusteaz gain. Udal gobernutik azaldu duten bezala, "2021eko aurrekontua diru-sarreren jaitsiera handi batek baldintzatzen du, eta, horren ondorioz, aurrekontua %5 murriztu da 2020arekin alderatuta, ia 615.000 euro gutxiago".
Aipatu beharra dago, Alkatetzak legegintzaldiaren hasieran hartutako konpromisoarekin bat etorriz, liberatutako langileen soldata (Alkatea eta Alkate Ordea) %5 jaitsi dela, 5.000 euro aurreztuz. Guztira, 11.760.105 euroko aurrekontua izango du Etxebarriko Udalak. Horri esker, "zerbitzuen %100, elkarteentzako, klubentzako, jai-batzordeentzako eta gainerako erakundeentzako diru-laguntzak mantendu ahal izango dira", eta gizarte-zerbitzuak lehenesten dira inor atzean ez uzteko. Inbertsio gutxi egingo dira, baina mantentze-lanetako zerbitzu guztiak eta kontratuak mantentzen dira: kale-garbiketa, hondakinen bilketa, lorezaintza, arrapala eta igogailuen mantentze-lanak, haur-jolasen mantentze-lanak.
"Inbertsiorik garrantzitsuena kiroldegiaren kanpoko plisti-plasta igerilekurako gela tekniko berri bat prestatu eta konpontzea izango da, 2020ko udako denboraldiaren ondoren erabilezin geratu baita", azaldu dute. Udaltzaingorako ibilgailu bat erosiko da. Berdintasun Zerbitzuaren esparruan, Genero Indarkeriaren Protokoloa eguneratzeari ekingo zaio eta adinekoen arloan, bi klubentzako diru-laguntzak eta jardueretarako partida osorik mantenduko dira. Basauri-Etxebarri Behargintzari egindako ekarpen berari eusten zaio ere eta Merkataritzan, Etxebarriko Bonuaren partida 17.000 eurora igo da. Beste alde batetik, Udaleko langileei %0,9ko soldata-igoera aplikatuko zaie.
Eztabaida eta parte-hartze prozesuan zehar, hasieran aurkeztutako proposamenaren gainean proposamen eta aldaketa batzuk ere onartu dira. Hauen artean, 2.000 euroko partida bat sartu da San Antonio parrokiara elikagai galkorrak banatzeko proiekturako. EAJ-PNV udal taldeak eskatuta, zinegotzien esleipenetatik eta udal taldeari emandako diru-laguntzatik %5 deskontatu da, hau da, urtean 550 euro aurreztu dira parrokiari 2.000 euroko esleipenaren zati bat ordaintzeko.
Gainera, "modernizazio-partida 5.000 eurotan handitu da, sarrerak erosteko, espazioak erreserbatzeko eta jarduerak on line ordaintzeko prozesuak hobetzeko". Bestalde, 4.000 euro Aingeruri laguntza proiekturako bideratuko dira, herritarrek balkoien dekorazio solidarioaren ekimenari emandako erantzun bikainaren ondoren.
Beharrentzako. Handitu egin dira egoera konprometituan dauden pertsona eta familientzako laguntzak. Gizarte-larrialdietarako laguntzen partida % 11 handitu da eta behar berezien gastuen partida %42a. "Nolanahi ere, kreditua handitzeko konpromisoa hartzen da, gerakinaren kontura, nahikoak ez badira".
