Durangoko Merkatuak tailer berriak eskainiko ditu maiatzean

Apirileko proposamenen arrakasta kontuan izanda,Durangoko Udalak Merkatua dinamizatzeko programazioarekin jarraituko du maiatzean zehar, hainbat nobedadez osatutako egitaraua eskainiz. Helburua, aurrekoetan bezala, tokiko gastronomia eta ekoizleen lana herritarrengana hurbiltzea da. Programazioa maiatzeko ostegunetan egingo da, 18:00etatik aurrera, eta maiatzaren 16an eta 23an, larunbatetan, goizez.

“Merkatuko ostegunetan” programaren baitan, programazioa maiatzaren 7an hasiko da 'Dastatu merkatua gaztaren bidez' jarduerarekin. Euskal Herriko gazten dastaketa gidatua izango da. Saioan, bertaratutakoek lurraldeko gazten aniztasuna ezagutzeko aukera izango dute, baita gazta mota bakoitzaren ezaugarri eta berezitasunak ere. 

Maiatzaren 14an sukaldaritza tailerra izango da Arrazolako Amillena jatetxeko Lur eta Vanesaren eskutik. Bertan, sasoiko eta hurbileko produktuekin egindako platerak eta elaborazioak erakutsiko dituzte.

Maiatzaren 21ean, Arabako Errioxako ardo eta olioetan oinarritutako Basque Wine dastaketa egingo da. Bertan, produktu horien ezaugarriak modu didaktikoan ezagutaraziko dira, esperientzia sentsorial baten bidez.

Azkenik, maiatzaren 28an garagardo dastaketa egingo da Garai Agro Brewery baserrian egindako garagardo ekologikoaren eskutik. Bertan, artisau garagardo mota ezberdinak eta horien ezaugarriak ezagutu eta dastatzeko aukera izango da.

Beste jarduera batzuk

Larunbatetako jarduerei dagokienez, maiatzaren 16an, 8:30etik 12:30era, Mungiako Germinados Kimuak ekoizle gonbidatua izango da azokan. Asierrek eta Mikelek ernamuin eta kimu ekologikoak modu artisauan ekoizten dituzte Mungialdean, eta beren lana ezagutaraziko dute. Horrez gain, haziak eta ernamuinak eskainiko dituzte etxeko autohazkuntzarako.

Maiatzaren 23an, 10:00etatik 12:00etara, “show cooking” bat egingo da Txaramela Pasta proiektuko Izaskun eta Ainararekin. Erakustaldian, pasta freskoaren elaborazioaren sekretuak partekatuko dituzte, eta barazkietatik eta sasoiko beste elikagai batzuetatik abiatuta kolore eta zapore desberdineko pasta nola sortu erakutsiko dute. 

Programazio honekin, Durangoko Merkatuak tokiko produktua ezagutzeko, ikasteko eta sustatzeko gune gisa duen eginkizuna indartzen du, tradizioa, hurbiltasuna eta jasangarritasuna uztartzen dituzten proposamenak herritarrengana hurbilduz, eta aldi berean, herritarrak jardueretan parte hartzera gonbidatzen ditu.