Jaietako txosnak eskatzeko epea ireki du Abanto Zierbenak

Apirilaren 16tik 27ra egongo da zabalikAbanto Zierbenako jaietan txosnak-jartzeko eskaerak aurkezteko. Interesa duten elkarte eta erakundeek hamar laneguneko epea izango dute. Udalak aste honetan abiarazi du baimen-prozesua. Martxoaren 16an sinatutako 0534 Alkate Dekretuaren bidez, Udalak espazio horien esleipena arautuko duen egutegia onartu zuen.

Iñaki Urrutia del Cura alkateak nabarmendu du prozesuak gardentasuna bermatzen duela; Kulturako zinegotziak, berriz, herritarren parte-hartzea jarri du jai-ereduaren ardatz gisa: “Txosnak gure jaien bihotza dira, udalerriak bere burua aitortzen duen gunea. Esleipen-prozesua gardena, ordenatua eta Abanto Zierbenako elkarte guztientzat eskuragarria izatea nahi dugu, salbuespenik gabe”.

Ediktua

Alkateak dekretua idazkari nagusia den Paula Costas Romerorekin batera sinatu zuen martxoaren 16an. Ediktua bederatzi egun geroago argitaratu zen Udalaren Egoitza Elektronikoan, martxoaren 25ean, Toki Araubidearen Oinarriei buruzko apirilaren 2ko 7/1985 Legearen 21.1 artikuluak ematen dizkion eskumenen arabera. Prozesua, halaber, 2016ko martxoaren 31n osoko bilkuran onartutako eta urte bereko ekainaren 2an Bizkaiko Aldizkari Ofizialean argitaratutako Udal Ordenantzaren arabera arautzen da.

“Jai-eredu parte-hartzaile baten alde egiten dugu, herriko elkarteak protagonista izango diren eredua. Araututako prozedura honek aukera-berdintasuna bermatzeko eta udal kudeaketa zintzo eta hurbila izateko bermerik onena eskaintzen du”, gaineratu du alkateak.

Epea

Parte hartu nahi duten erakundeek eskaera-orri ofiziala bete beharko dute eta hiru baldintza egiaztatu: arautzen duen ordenantzaren edukia ezagutzea, Udalarekin zorrik ez izatea eta zerga-betebeharrak eta Gizarte Segurantzarekikoak egunean izatea. Eskaera er​akundearen izenean aurkeztu behar da, ez banaka, eta horrek ereduen izaera elkartekoa eta komunitarioa indartzen du.

Behin epea itxita, Abanto Zierbenako Udalak maiatzaren 1ean argitaratuko du onartutako erakundeen behin-behineko zerrenda. Bertan agertzen ez direnek edo akatsen bat antzematen dutenek bi asteko epea izango dute erreklamazioak aurkezteko, maiatzaren 16ra arte. Behin betiko zerrenda maiatzaren 18an emango da argitara. Eskabide kopurua eskuragarri dauden espazioak baino handiagoa bada, esleipena maiatzaren 22rako aurreikusitako zozketa publiko bidez egingo da. Emaitzak maiatzaren 27tik aurrera argitaratuko dira Udaleko iragarki-taulan.

Inprimaki ofizialak, udalerriko bi hizkuntza ofizialetan idatzita, dokumentu bakarrean jasotzen ditu bai eskaera, bai ordenantzak eskatzen dituen erantzukizunpeko adierazpenak. Udalak interesdunei gomendatzen die epea azken unera arte ez uztea, aurkezteko tartea hamar lanegunekoa baino ez baita.