Durangoko Udalak bere lehen Etxebizitza Plana onartu du

2025eko abenduko EAEko Soziometroaren arabera, biztanleen % 58k uste du etxebizitza dela arazo sozial nagusia. Arazo horri aurre egiteko, Durangoko Udalak udalerriko lehenengo Etxebizitza Plana onartu berri du. Egoera honen aurrean, Udalak plan egituratu batekin eta neurri zehatzekin jardutea erabaki du, plangintza teknikoa, erakundeen arteko lankidetza eta udal tresnak uztartuz.

Plana Udal Gobernua osatzen duten taldeen (EAJ-PNV eta PSE-EE) aldeko botoekin eta PP oposizioko taldearen babesarekin onartu da. EH Bildu abstenitu egin da eta Herriaren Eskubidea alderdiak ez du bozketan parte hartu.

Dokumentuak datozen bost urteetan garatuko diren hainbat neurri jasotzen ditu, etxebizitza-eskaintza handitzeko, hutsik dauden etxebizitzak erabileran jartzeko, gazteen sarbidea errazteko eta arlo horretako kudeaketa publikoa hobetzeko.

Udalaren adierazpenak

Mireia Elkoroiribe Durangoko alkateak azpimarratu du planaren helburua argia dela: “Etxebizitza eskuratzea herritarren kezka nagusietako bat da gaur egun, baita Udal honentzat lehentasuna ere. Lehen Etxebizitza Plan honekin urrats sendoa ematen dugu Durangoko gazteek beren bizi proiektua hemen garatu ahal izateko eta gure udalerrian bizi eta lan egin nahi dutenei aukerak eskaintzeko”.

Elkoroiribek nabarmendu du, gainera, planak ibilbide-orri egonkor bat ezartzen duela datozen urteetarako: “Ez da neurri isolatu bat. Estrategia integrala da, lehen etxebizitza tasatuak eta 16 etxebizitza sozial eskura jarriz hasitako bideari jarraipena ematen diona, eta etxebizitza berriak, etxebizitza hutsak erabileran jartzea, pizgarriak eta kudeaketa publiko hobea uztartzen dituena”.

Bestalde, Jesica Ruiz alkateordeak adierazi du planak hainbat talde politikoren proposamenak jasotzen dituela: “Plan hau adostasunerako borondatearekin sortu da. Neurri askok hainbat udal talderen ekarpenak jasotzen dituzte. Helburua argia da: etxebizitza-parkea handitzea eta Durangon etxebizitza eskuratzea erraztea”. Etxebizitza Planak lau eremu nagusi ditu:

Etxebizitza-politiken udal-kudeaketa bultzatzea

• Durango Eraikitzen sozietate publikoa indartzea etxebizitza-politikak garatzeko.
• Etxebizitzarako udal-bulego bat sortzea, herritarrei informazioa, aholkularitza eta zuzeneko arreta emateko.
• Gazteek alokatzeko udal-dirulaguntzak berrikustea, haien irismena handitzeko eta Eusko Jaurlaritzaren laguntzekin bateragarri egiteko.
• Bakarrik bizi diren adinekoei zuzendutako Bizigune eta Bizihabi gisako ekimenei buruzko informazio-programak.

Hutsik dauden etxebizitzak erabileran jartzea

• Udal programa berria, 5.000 eurora bitarteko laguntzekin, hutsik dauden etxebizitzak birgaitzeko eta bost urtez Bizigune programan sartzeko.
• Etxebizitza hutsen alokairua sustatzeko sentsibilizazio-kanpainak.
• OHZren %90era arteko hobariak, arrazoizko alokairuko programa publikoetan sartutako etxebizitzetarako.

Etxebizitza babestuen parkea handitzea

• Etxebizitza babestuen eraikuntza bultzatzea, Eusko Jaurlaritzarekin lankidetzan.
• Bizitegi-formula berriak aztertzea, hala nola zuzkidura-bizitokiak, belaunaldien arteko etxebizitzak edo gazteentzako eta adinekoentzako irtenbideak.
• Bulegoak eta lonjak etxebizitza babestu bihurtzeko aukera, bizitegi-eskaintza handitzeko.

Etxebizitza turistikoen erregulazioa

• Udalak etxebizitza turistikoak arautzeko prozesuari ekingo dio, HAPOren berrikuspenaren esparruan, bizitegi-merkatuan egon daitezkeen gorabeherei aurrea hartzeko.

Birjinoste eta San Fausto

Ekimen hori Birjinosteko 22 etxebizitza tasatuei eta San Faustoko 16 etxebizitza sozialei gehitzen zaie, eta, horrela, udalak etxebizitza eskuratzeko duen konpromisoa indartzen da. Gainera, Udalak Eusko Jaurlaritzarekin batera lan egingo du 10 urterako etxebizitza-plan bat egiteko, udalerriko bizitegi-beharrak modu estrategikoan planifikatu ahal izateko.

Ildo horretan, Udal Gobernuaren etxebizitza-politikak aurreikusten du datozen urteetan gutxienez babes ofizialeko 530 etxebizitza tasatu eraikitzea, Durangon etxebizitza-eskaintza handitzeko. Udalak 2026tik aurrera hainbat udal lursailetan obrak hastea aurreikusten du, non alokairu sozialerako 330 etxebizitza garatuko diren hainbat eremutan, hala nola BEPB (84), Faustegoiena (23), Birjinoste (39), Larrasoloeta (38), Iparzabalarra (30), Arripausueta (50), Kabilduoste (18) eta Mikeldi (48). Horiei 190 etxebizitza tasatu gehituko zaizkie, eta San Fauston (88), Kabilduosten (18) eta BEPBn (84) sustatuko dira.

Durangoko Udalak uste du lehen Etxebizitza Plan honek oinarri sendoa ezartzen duela udalerriaren erronka nagusietako bati aurre egiteko, neurri errealistekin eta etxebizitza-eskaintza handitzea eta durangarrentzako sarbidea hobetzea ahalbidetuko duen plangintzarekin.