Marijesiei buruzko solasaldia ospatuko da Gernika-Lumon

Gernika-Lumok urtero bezala Marijesiak, gabonen aurreko bederatziurrena, ekingo dio berriro gabonak baino lehen, eta, horretarako, entseguak hasi dira. Gaueko errondak abenduaren 16an hasiko dira, astearte goizaldean, kaleetan zehar. Aurten, Iñaki Gonzalez, Denis Azkarate, Fernando Astoreka, Ane Miren Arejita eta Alex Uriarte bakarlarien eskutik iritsiko dira koplak, taldea ondoan dutela, eta horrela bederatzi gauez Gernika-Lumon zehar ibiliko dira punta batetik bestera, ahal den leku guztietara iritsiz. 

Bestalde, aurreko urteetan bezala aurten ere jarduera osagarri bat antolatu da Marejesien inguruan. Kasu honetan Itziar Navarro Ibañez Musikologo doktoreak 2021-2024 urteen artean egindako tesiaren aurkezpena izango da.

Tesi horretan abenduko marijesiak edo errondak aztertzen dira, gizartearen eta musikaren ikuspegitik, arreta berezia jarriz errondetan parte hartzen duten pertsonen diskurtsoetan eta praktiketan, azken hamarkadetan izan diren aldaketak ulertzeko. Ekitaldi hau abenduaren 15ean izango da, astelehena, Gernika-Lumoko Kultur Etxean, 18.30etik aurrera ‘Abenduko txanden bilakaera Bizkaian: diskurtsoak eta praktikak’ izeneko solasaldiarekin.

Tesian aztertutako herriak Ea, Lekeitio, Ibarrangelu, Muxika, Gernika eta Iurreta dira. Ohitura hori gaur egun eta Bizkaiko beste leku batzuetan baino zabalagoa izan zen garaian, haren aztarnak daude. Urteetan zehar, Navarrok testigantzak hartu ditu, batez ere bizirik mantendu diren herrietan: melodiak, letrak, inguruneko erabilerak... eta, azkenik, azterketa etnomusikologikoa egin du konparazioaren bidez.

Musikaria eta etnomusikologoa

Itziar Navarro Ibañez musikaria eta etnomusikologoa da. Goi Mailako gitarra ikasketak egin zituen Musikenen (2013) eta Kultur Musikologiako masterra Göttingenen (2017). EHUko Mikel Laboa Katedraren saria jaso zuen Oiartzungo bertsolarien kantaerari buruz egindako master-amaierako ikerketarengatik. 

Navarro musikologian doktorea da, Bizkaiko abendu-erronden inguruko tesiarekin (Bartzelonako Autonoma Unibertsitatea, 2024).  

Bestalde, 2025/26 ikasturtean Donostiako Lugaritz Kultur Etxean Herri-kanten laborategia gidatzen du asterokoan. Bertsozale Elkarteko Doinutegi batzordeko kide ere bada eta aurten Durangoko Azokan salgai egon den Euskal musikaren historia liburuaren egileetako bat da.

Musikari bezala, Eia Trio eta Emari taldeetan dabil. Berriki txalapartari gisa ere hasi da Oreka TX taldean (Ikimilikiliklik, 2025).