'Jai demokratikoen aldeko borroka' erakusketa, ikusgai Zelaieta Zentroan

Astelehen honetan, abenduaren hasierarekin batera, 'Jai demokratikoen aldeko borroka. 1975-1976ko Karmenak' izeneko erakusketa inauguratuko da Zelaieta Zentroko erakusketa gelan. Mikel Etxebarria Etxeitaren lana da, eta Amorebieta-Etxanoko historia garaikideko garai erabakigarri bat jasotzen du. Erakusketa abenduaren 22ra arte egongo da ikusgai. Sarrera erabat doakoa izango da, eta horren inguruan bi hitzaldi eta bisita gidatu antolatu dira. Erakusketan, Zornotzako gazteriak duela 50 urte jai herrikoi eta parte-hartzaileago batzuen alde egindako borrokaren oroimena jasotzen da.

1975ean, Franco diktadorea oraindik bizirik zela, herriko gazteek jai-egitarau alternatibo bat proposatu zioten udalari. Hala ere, alkate frankista zen Agustin Uriak erabat baztertu zuen proposamena, eta horrek protestak eragin zituen. Protesta horiek errepresioarekin eta isunekin amaitu ziren, baina hala ere arrakastatsuak izan ziren, 1976ko jaiak herriko gazteek antolatutako lehenengo jaiak bihurtu baitziren, gure herriko historian mugarri bat ezarriz.

Erakusketaz gain, bi hitzaldi eta bisita gidatu antolatu dira, une historiko hori sakonago ezagutzeko aukera paregabea:

• Abenduaren 2an,asteartea, 19:00etan – Hitzaldia eta bisita gidatua euskaraz
• Abenduaren 9an, asteartea, 19:00etan – Hitzaldia eta bisita gidatua gaztelaniaz

Erakusketa eta horren harira antolatutako hitzaldiak eta bisita gidatuak doakoak dira. Gure herriko historiaren pasarte garrantzitsu hau ezagutzeko aukera bikaina da, eta batez ere, gazteek jai parte-hartzaile eta askearen alde egin zuten borrokari balioa emateko modua.